Real Madrid manager Jose Mourinho chuan Manchester City leh Premier League inkar thubuai chin fel a ni har tawh lutuk chu fiamthu thawh nan a hmang a, a hringnun aia a rei zawk theih thu a sawi.
Thuneitute chuan Manchester City hi 2009-10 leh 2017-18 season inkara sum leh pai dan bawhchhiatnaa an puhna zawng zawngah thiam loh an chantir a. City chuan thil dik lo engmah an ti lo tih sawiin thutlukna hi an khing let mek a ni.
Premier League chuan Manchester City hian kum 10 chhung vel zet an sum lak luh dan chungchang chu a dik loin an ziak lut tih hmuh chhuah a ni a. League thuneitute sawi danin heng an thil tihte hian sum leh pai puan chhuah na dik lo leh sum hman dan zawm tur bawhchhiatna a thlen a ni.
Mourinho thusawi hian English football-a a hun hman thin ngaihtuahin awmze thuk tak a nei a. Ani hi kum kum 2016 atanga 2018 chhung khan Manchester United manager a lo ni tawh a, hemi hun chhung hian 2017-18 Premier League campaign-ah Pep Guardiola enkawl Manchester City hnung chiahah awmin pahnihna an lo ni tawh a ni.
He thil chungchang hi sawiin Mourinho chuan City hian thutlukna hi an khing let mek a, a dang pawh an la khing let zel dawn si a, thutlukna tawp ber a chhuah huna a la dam ve a nih chuan a vannei hle dawn tih thu a sawi.
Italy chanchinbu Corriere dello Sport-in he thubuai chungchang an zawhna chu Mourinho chuan, “Ka nuih liampui mai mai tawh,” tiin a chhang.
“A tawpa thutlukna hi chu kan la hmu ngei ang, mahse kan pahnih hian kum 60 chho kan ni tawh a, thutlukna tawp ber a chhuah hunah pawh kan la dam theih chuan kan vannei hle dawn a ni. Thutlukna a awm ang a, chumi hnuah an khing let leh ang a, chu lo pawh chu vawi tam tak an la khing let zel ang,” a ti bawk.