Mizoram sorkar chuan tunlai hiain luidung humhalh hun hmangin, hmun hrang hrangah Nghafuan ven hun a hmang a, YMA te nen tang tlangin nghafuan ven hun an hmang bawk.
Kan ram luidungte hi humhalh an ngai a, a tibawlhhlawhtu leh a titlarantu chu keimahni tho kan nih avangin theihtawpa hmalak kawnga kan thanharh a tul hle.
Sangha inthlahpun hun, nghafuan ven hunte hi tun hma kha chuan a ngai kher lo a ni thei a, mahse tunah chuan a tulin a tul tawh a, mihring pung zel leh kan luidung chereu leh kangchat nasa tawh tak avang hian nasa zawka humhalh tura kan chet a ngai tawh hle bawk.
Sangha te hi a kum tluana awm tur an ni lo a, kan eikhawp kan hmu lo telh telh a, luidung nungcha kan manna hmun pawh khawtinah a hla telh telh zel bawk. Hei hian kan thangharh a tulzia a hril chiang viau bawk awm e.
Tun hi humhalh hun, ven hun, insum hun a ni tih hria ila, sorkar leh tlawmngai pawlten nghafuan ven hun an siamte hi zawm tha ila, lo insum hram hram pawh tum ang u. Nakina kan mamawh leh kan tangkaipui theih zawk tur a nih avangin tun hi insum hun, sorkar thupek zawm hun a ni tihte hre tel bawk ila.
Luidung nungchate hi kan ei tura siam chu an ni nameuh mai a, mahse mihring kan pung a, kan changkanna hnathawh hrang hrang avangin kan tichereu telh telh thung a, insum hun lai hi chuan theihtawpa inveng chungin sorkar leh ram dan zawm kawngah i thangharh hram hram teh ang u.