World champion Lando Norris chuan India-a Formula 1 lak luh leh an tum mek laiin India-a intlansiak a châk thu a sawi.
Indian sorkar chuan chhiah leh sum leh pai harsatna vanga kum 2011 leh 2013 inkara intlansiak vawi thum an neih hnua khaihlak ta, Indian Grand Prix kaih thawh leh tumin task force an din thar tawh a ni.
Greater Noida-a Buddh Circuit neitu thar, Adani Group chuan intlansiak chungchangah hian Formula One Management an dawr tawh a; mahse, tun hnaiah erawh he intlansiak hi neih a nih theih hmel rih loh.
Norris-a chuan Formula 1-in a tar lan dan thar berah India-ah he infiamna ngaisangtu mi maktaduai 98 an awm tih a hria a, simulator hmanga he track-ah hian a lo tlan tawh vanga a taka tlan ngei a châk thu a sawi a ni.
“Heti lai hmunah hian simulator-ah leh game-ah te ka lo tlan tawh thin a. A tak takah erawh he track-ah hian ka la tlan ngai lo. Simulator vela track ang kha a nih phei chuan track mawi tak a ni a. Chuvangin, a taka tlan ngei hi ka châk hle,” a tiin a ni.
Norris hi India-ah a la kal ngai lo va; mahse, a thian tha berte zinga mi chu Indian driver Jehan Daruvala niin junior formula-ah McLaren driver nen hian an lo tlan dun tawh a. Daruvala hian Formula 2 aia sang a thleng thei lo va, chuti chung chuan Norris nen hian thian tha tak an la ni reng a ni.
“India-ah hian fan tam tak ka nei tih ka hria a, ka teammate ni thin, ka thian tha ber zinga mi, Indian driver Jehan-a hi kum tam tak ka lo hre reng thin. Amaherawhchu, India-ah hian ka la kal ngai si lo va, a hmuna han tlawh chhuaha han tlan ngei hi ka châk hle a ni. Helai hmuna mite hian he infiamna hi an ngaina tak zet a ni tih ka chiang a ni,” a ti.
“Formula 1 hi an ngaina a, infiamna hrim hrim pawh an ngaina hle a. Cricket leh a dangte pawh a lar hle tih ka hria. Chuvang chuan Formula 1 tan pawh thil lawmawm tak a ni ngei ang a, a thlen hun tur hi ka nghakhlel tak zet a ni,” tiin Norris chuan a sawi.
Intlansiak thleng tur hian sum pawh a ngai hnem dawn hle a, kum khat atan thlen man hrim hrim hi Rs. vaibelchhe 300 atanga vaibelchhe 500 inkar a ni a. Chu bakah, Greater Noida-a track hi siam tha thar leh tura beisei a ni a, he mi hmun siam tharna atan ringawt pawh Rs. vaibelchhe 150 atanga vaibelchhe 200 vel zet an sen a ngai dawn a ni.