Aizawl: MNF Policy & Programme Committee Chairman leh Senior Vice President ni bawk, Dr. R. Lalthangliana chuan tunah hian an party chuan ram leh mipui tana ruahmanna tha ber siam tura manifesto an ngaihtuah mek thu sawiin, an programme duan thar mek chu a dan a dangin a tha filawr hle dawn tih a sawi.
Thawhlehni khan Zarkawt Community Hall-ah MNF Aizawl North III Block huaihawtin ‘Headquarters intlawh chhuahna leh infuihtharna hun’ hman a ni a. He hun hmanpuitu Dampa bialtu MLA Dr. R. Lalthangliana chuan MNF policy committee chuan hun kal tawha thil tha lo laite paihin, tunlai khawvel mil ang zela a tha thei ang berin ruahmanna an siam mek tih a sawi.
He programme thar hi khawpui leh thingtlang mipuite tan a chhenfakawm hle dawn tiin, a puan chhuah erawh an hmanhmawh lo va, party hotuten hun dik tak an tiha la puang mai dawn an nih thu a sawi bawk.
Dr. R. Lalthangliana chuan MNF a sorkar leh velah Mizoram a chhiat a thata mawhphurhna la ngam, rin ngam, rintlak sorkar ngei an din leh dawn tih a sawi a. Mipui hmaa thu sawiin social media-a dawt ngialngana inchirhthehna leh thu dik lova inpuhna nasa lutuk chu thil pawi tak a nih thu a sawi a. Party dangte dik lo taka puh leh sawichhiat ringawt hnaa neih chu a daih rei a rin loh thu a sawi a ni.