EverHome Youth Icon 2026-a intihsiakna neih meka endiktu turte chu tih chian a ni ta a, kum 2024-a Judge mi 3 te’n intihsiak an endik leh dawn.
LPS Vision Production chuan EverHome Youth Icon 2026 Judge turte a puang chiang ta a, kum 2024-a Youth Icon thlanna neiha Judge pathum – Victor Vanlalhruaia, Rosy K. Remsangpuii leh . Andrew Laltlankima ten zai intihsiak hi an endik leh dawn a ni.
Youth Icon Judge turte hi Rimawi khawvel tawn hriat ngah tak te an ni a, Victor Vanlalhruaia hi Rimawi tum thiam, rimawi leh zai intihsiak endikna kawnga tawn hriat ngah a ni a, Rosy K. Remsangpuii hi Gospel Singer lar, Zai intihsiak endik kawngah tawn hriat ngah, Youth Icon Judge pawh lo ni fo tawh a ni a, Andrew Laltlankima pawh Mizo zaithiam lar, hla phuah thiam leh rimawi khawvela tawn hriat nei tha tak a ni.
LPS buatsaih zai intihsiakna neih mekah hian application form lak chhuah ngai lovin virtual audition hmangin October ni 24,2026 thleng mahni zai video theh luh theih a ni a, tunah hian Mizoram chhung leh state pawn atangin zai mi, mi thahnem takin an zai video an thehlut tawh a ni.
Audition Round paltlangte hian November ni 3,2026 atangin 1st Round intihsiak an hmachhawn anga, LPS Studio-ah intihsiakna neih a ni anga, LPS 1-ah Live in pek chhuah leh a ni dawn.
LPS chuan EverHome Youth Icon 2026-a lawmman turte pawh an puang chiang tawh bawk a, pakhatna in Rs. nuai 2 a dawng dawn a, pahnihin Rs. nuai 1 leh pathumnain cheng sing 7 an dawng ang.