Aizawl: BJP Aizawl district leh Siaha district chuan Nilaini khan midang tana luanchhuahna ‘Seva Sankalp Abhiyan’ program kal zelah mipui puihna tur ‘Help Desk’ an buatsaih.
BJP Aizawl District chuan Vana Pa Hall kawtah ‘Seva Setu Abhiyan’ hnuai a central sorkar scheme hrang hrang kaltlanga mamawhtute puihna tur ‘Help Desk’ hi an buatsaih a. He hunah hian kum 70 chunglam senior citizen-te tana PM Healthcare Scheme Golden Card siam leh Pradhan Mantri Awas Yojana (PMAY) dilna te a hmunah an tihsak nghal a ni.
Ruahman dan chuan Ningani hian Upper Republic-a BJP State Office-ah ‘Help Desk’ hi chhunzawm a ni ang a, Zirtawpni-ah Vana Pa Hall kawtah hian mipui dawr theih turin hawng leh dawn a ni.
Luanchhuah program hi Prime Minister Narendra Modi piancham puala September 17 atanga October 17, 2026 thleng thla khat chhung neih tura ruahman a ni a, Mizoram chhunga district hrang hrangah pawh kalpui mek a ni. Mizoram mipui nawlpuiin PM Scheme hrang hrang an hriat fiah zual nan leaflet pawh buatsaih niin, a duh tan lak theih a ni bawk.
BJP Siaha District pawhin Nilaini vek khan he program pual a ‘Seva Mera Yogdan’ hmangin Kalvary Healing Centre-ah thilpek hrang hrang an hlan a, upate enkawlna hmunah hman tur steel almirah te an pe a ni.