Aizawl: Mizo hnamzia, nunphung, boruak leh tui thianghlimte humhalh zel a nih loh chuan tun atanga kum 10 hnuah khualzinten Mizoram rawn tlawh chhan tur an nei dawn lo nia sawiin, Tourism Minister Lalnghinglova Hmar chuan environment leh hnam nunze humhalh a pawimawh thu a sawi.
Nilainia Assembly Annexe Hall-a ‘Mizoram Travel Fest’ ni hnihna a hmanpuinaah he thu hi sawiin, Minister chuan sorkarin khualzin hipna tihmasawn turin ruhrel leh sum peipunna lam tihhmasawn kawngah te, tualchhung mipuite’n an chhawr tangkai theih tur boruak siam an ngaihpawimawh thu a sawi a. Private sector-te chu tualchhung mipuite nena thawk hova responsible tourism, community tourism leh green tourism-te uar turin a sawm a, plastic hmang lo tura hmalak mek a nih thu a sawi bawk.
Minister chuan khawvel hmun danga awm ve lo, kum tin Mizo Krismas hman a nih danah thingtlang hmun hrang hrang a ruai theh thinte chu Mizo chaw leh khawsakphung dik tak hmuhna a nih avangin khualzinte chu Krismas huna thingtlang tlawh turin a sawm a; Myanmar tualchhung buaina a ziaawm hunah Rihdil pawh tlawh theih a nih tur thu a sawi.
Ni thum chhung awh tur, Tourism department buatsaih ‘Mizoram Travel Fest’ hi Thawhtanni khan tan niin, MZU-a Mass Communication leh Tourism department zirlaite leh mithiam hrang hrangte nen thupui hrang hrang zirho a ni a, vawiin hian he travel fest hi a tiak ang.