Aizawl: Chief Minister Lalduhoma chuan Zoram Medical College & Hospital (ZMC&H), Falkawn-ah Cardiothoracic & Vascular Surgery (CTVS) Unit a hawng.
He unit hi Mizoram sorkar, Doctors for You leh SBI Mutual Funds Management Limited-te tang rualin, SBI Mutual Funds CSR fund Rs vbc 3.7 seng tura din a ni.
Nilainia hawnna inkhawmah chief minister chuan Health Minister Lalrinpuii hmalakna leh SBI Mutual Funds leh Doctors for You-te tanpuina chungah lawmthu a sawi a. Mizoram hian CSR fund a hmuh tlem thu sawiin, SBI leh Doctors for You te chu Mizorama CSR hmalakna tam zawk nei chhunzawm zel turin a sawm nghal a ni.
ZMC&H tihhmasawn zel tumna hnuaiah SASCI kaltlangin Rs vbc 5.6 senga Dialysis Unit 21 dah belh tura hmalak mek a nih thu leh complex chhung kawng siam that hna thawh a nih tur thu chief minister chuan a sawi a. Hei bakah hian Auditorium, Cath Lab, IVF Centre Level-2, Neurosurgery Unit, leh High-End Ultrasound Machine-te pawh sum awm dan zela ruahman chhoh a nih tur thu a sawi bawk.
ZMC-ah hian kumin March atang khan thisen zam zaina kalpui tan a niin, August 19, 2026 khan Mizoram sorkar damdawi ina a vawikhat nan lung zai hawnna hlawhtling tak neih a lo ni tawh a ni.