Aizawl: Union Ministry of Development of North Eastern Region (DoNER) Secretary Srinivas R. Katikithala chuan ni hnih chhung Mizoram a cham chhungin Nilaini khan Keilungliah Dam leh Zokhawthar a tlawh.
DoNER Secretary hi Senior Economic Adviser Nilambuj Sharan, Agriculture Secretary Ramdinliani, Horticulture Secretary Maria CT Zuali leh district official-ten an tawiawm a ni.
Keilungleah Dam hi Champhai khawpui leh kuthnathawktute tui mamawh phuhruk tur leh tourism, sangha khawi leh sik leh sa tinuamtu tura ruahman a ni. Tunah hian Swadesh Darshan 2.0 fund hmangin Tourism department chuan he dam-ah hian cottage, naupang infiamna hmun leh khualzin tana ruahmanna hrang hrang huam telin ‘Eco Resort Experience at Keilungleah’ tih hming puin hma a la mek a ni.
Hemi hnu hian DoNER Secretary leh a thiante chuan Zokhawthara Assam Rifles hmun tlawhin hotute nen an inkawm a. Zokhawthar Land Custom Station pawh tlawh lehin, station thawktuten border trade leh an hnathawh dante an lo hrihfiah a ni.