Union Minister of State for Education leh DoNER Dr. Sukanta Majumdar chuan Nilaini khan PM-DeVINE scheme kaltlanga Rs vbc 500 senga laih mek ‘Aizawl Bypass on Western Side’ a tlawh.
Union Minister hian Sihhmuia base camp tlawhin PWD official-te leh contractor RG Buildwell Engineers Pvt. Ltd. hruaitute nen an inkawm a. January 16, 2026-a hnathawh tan niin tun dinhmunah zaa 33.61 zawh a ni tawh a, January 2028-a zawh fel tura ruahman a ni.
Dr. Majumdar chuan Aizawl khawpui traffic tawt tihzangkhai leh zauh belhna kawnga a pawimawh avangin hun tiam chhunga zo ngei tur leh hnathawktu leh khawl dah belh turin a hriattir a, khawpui atanga Bypass Road zawmna (approach road) te chu state fund atanga siam belh a tul tur thu a sawi bawk.
PWD hotute chuan bypass road laih mek hian Lengpui Airport, Sairang Railway Station, Industrial Growth Centre Luangmual, Zoram Medical College & Hospital leh Mizoram chhim lam tan inkalpawhna tha leh awlsam a thlen dawn tih sawiin, Mizorama khualzinte tlawh hlawh ber pakhat Reiek khaw kalkawng a pawh dawn avangin tourism lamah hmasawnna nasa zawk a thlen theih dawn thu leh kawngpui tha chuan kuthnathawktute thar chhuah phurhna a ti ziaawm ang a, he kawngpui chhehvela chengte tan pawh eizawnna kawngah hmasawnna a thlen thei dawn tih an sawi.