Aizawl: Chief Minister Lalduhoma chuan Nilaini khan Assembly Annexe Conference Hall-ah ni hnih awh ‘Mizoram Tourism Conclave 2026’ a hmanpui a, investor-te chu Mizoram tourism sector-ah kutthlaka investment siam turin a sawm.
‘Investing in Mizoram CAN (Culture, Adventure and Nature for Sustainable Development)’ tih thupui hmanga Mizoram Tourism Conclave hun hmanah chief minister chuan Sairang thlenga rel a lo thlen tawh avangin Mizoram chu tlawhpawh a lo awlsam tak thu leh kumin September thla thleng khan khualzin nuaih ruk velin an tlawh tawh thu sawiin, mikhual thlenna hmun ten an dawl loh lek lek tawh avangin tourism lama investment neih hi investor-te tan buaipui tlak tak a nih thu a sawi a ni.
Khualzin hip zual nan sorkar laipui nena tangdunin hmun hrang hrangah Rs. vbc 681.16 man infrastructure siam mek a ni a, state flagship scheme ‘Bana Kaih’ atangin Rs. vbc 11.10 man ruahmanna siam mek a ni a. Hei bakah hian thingtlang lamah mipuite nena tangruala hmalakna uar a niin, Bana Kaih, CSR leh PM JUGA kaltlangin homestay thar 199 siamna tur hawn a nih tawh thu chief minister hian a sawi bawk.
Lalduhoma chuan Mizoram khualzin hipna tur lungphum thum — Zo nun ze mawi leh faina, Adventure sport (paragliding, marathon, cycling), leh ram ngaw, tlang leh wildlife sanctuary-te behchhana investment kalpui turin kalkhawmte a sawm a ni.
He hunah hian Tourism Minister Lalnghinglova Hmar pawhin thu a sawi a. CM Adviser Lalmuanpuia Punte leh Lt. Col. Clement Lalhmingthanga, MLA ten conclave-ah an telpui bawk a ni.