Mizoram Labour Link LPS Pro Fight 2026 Title Fight zan a ni ta a, weight pangaah kawnghren changtu tur a chiang dawn a. He hunah hian weight hrang pathuma champion hmasa ber nih tum, HC Lalramfela’n Pro Fight-a a vawi telnaa kawnghren chuh thei, Lalnunzira a su dawn.
Kum 31 mi, Ramfela hi kum 2015 khan bantamweight leh 2023-ah lightweight-ah a lo champion tawh a, tunah welter-ah kawnghren chuh thei turin a inhlang kai a, Pro Fight chanchina weight hrang pathuma champion hmasa ber ni thei turin hun tha a nei a.
Kum 2024 khan lightweight title a kawl lai kalsanin welter-ah hian a insawn a; mahse, semifinal a pal tlang zo lo va. Kuminah champion lai, Lallawmawma’n a khelhna sawnin light-ah chona a hmachhawn ve thung a, a kalsan champion kawnghren rochuntu ni turin Haulawng fighter a patlang a ngai dawn.
“Zira hi boxer tha tak a ni a, kum lamah keini aiin an nau a, a khel ka lo hmu fo tawh a, tha ka ti hle. Thangthar tha za zawk nen kan intawng dawn a, chona tha tak niin ka hria a, hmuhnawm taka kan inhnek ngei ka beisei,” a ti.
Kum 23 mi, Zira hi Pro Fight-ah a tel vawi khatna a nih avangin hriat a hlawh tawk lo va; mahse, kum bithliah inelnaah Mizoram tan gold medal hnek chhuak tawh a ni a. A hmaa ding tur, Ramfela a hriat chian thu leh a ngaisan thin a nih thu a sawi.
“Ka huphurh lo va, kan naupan laiin a hnek kan en thin a, amah nena inhnek hi ka châk viau a ni,” a ti a. “Chak ngei ka tum a, kan khuaah champion kawnghren hawn ngei tumin ka inhnek dawn a ni,” a ti.
Flyweight-ah Pro Fight a tel hnuhnung pahniha title fight thleng thei, kawnghren hawn zo lo, Vanlalenkawltira a inlan leh dawn a, kum 2024-a a hneh loh, champion lai, Lalrinngheta a hmachhawn ang.
Kum 24 mi, Tuipui boxer Rinngheta hi kum 2022 khan bantamweight-ah a lo champion tawh bawk a, F Zoramchhana a hneh a. Light-ah insawn zuiin a hlawhtling lo va, kum 2024 khan fly-ah insawn lehin title fight-ah Enkawla a hneh a ni.
Tharum ngah lo mah se Rinngheta hi a hnek thui a, lehlamin an rawn nawr laia thiam taka lo hnek thin a ni a, title humhima a vawi thum nan Pro Fight champion nih tumin NTP Boxing Gym-ah a inbuatsaih.
“Kar khatah vawi hnih sparring ka nei thin a, boxer tha tak tak ka inhnekpui thin. Champion kawnghren ka hawn leh ngei dawn a, min laksak thei lo hrim hrim ang,” a ti.
Champhai Dinthar tlangval kum 23 mi, Enkawla hi a zawnin vawi thum title fight-ah a inlan dawn a, kum 2023 khan NT Lalbiakkima a hneh lo a, kum 2024-a Rinngheta laka a tlawmna chhan let tum a ni a, a vawi khat nan Pro Fight champion a nih ngei a inring.
Tun tumah hian Pro Fight hi amatuer anga kalpui a nih rualin kuminah professional huangah Enkawla a inhnek nasa a, vawi nga inhnekin tum li a chak a, a vaiin pro boxing tum 12 khel tawhin vawi riat a chak a, tum hnih tlawmin vawi hnih tho a inhnehtawk.
“Chetsual nawn leh ka tum tawh lo. Kan vanneih hun a thlen ve tawh ngei ka ring a, champion tawh ngei ka tum a, ka inringtawk hle a ni,” a ti.
Pro Fight 2026 Title Fight hi Zirtawpni zan hian LPS Arena, Falkland, Aizawlah neih a ni dawn a ni.