Aizawl: School Education Minister Dr. Vanlalthlana chuan MBSE Conference Hall-ah MBSE buatsaih Random Examination 2025 Report Card leh mobile app pahnih— Confidential Material Tracking & Monitoring System (CTMS) leh School Report System (SRS)-te Ningani khan a tlangzarh.
Tlangzarh inkhawmah Dr. Vanlalthlana chuan zirlaiten an zir chhuah a pun theih nan sum neih loh chhuanlam a awm thei lo tih sawiin, ram pum huap chawhrual la pha lo an nih avangin Random Examination leh Common Question-te hian zirna a puih theih beisei tih a sawi.
Minister chuan India ram pumah Mizoram chu damdawi ti nasa ber a ni hi khawi atanga intan nge tih chhui a tul tih sawiin, Middle School atanga moral reform tana state drug policy duan mek a nih thu leh comics hmanga nungchang tha zirtir tum a nih thu a sawi a. Zirtirtute chu Class IX syllabus-te a kim thei ang bera zirtir turin a ngen a, zirna kalphung rem fel mek zel a nih avangin hmasawnna pawh a thlen ngei a beisei thu a sawi bawk.
Tlangzarh tak MBSE-CTMS App hi Exam Centre Superintendent-ten exam material chhui leh report nana an hman tur a ni a, MBSE-SRS App hi Board leh School-te indawrtawnna tura ruahman a ni.
Class 3, 6, leh 9-te tana neih Random Examination 2025-ah hian school 232 atangin zirlai 8,856 an tel a, zaa 65.24 an pass a ni.
MBSE Chairman JH Zoremthanga kaihhruai he inkhawmah hian department hotu hrang hrang leh district hrang hrang atangin zirtirtute an tel.