Aizawl: Lunglei NGO Co-ordination Committee-in Lunglei Municipal Council (LMC) leh UD&PA hnuaia District Urban Development Office (DUDO) chhun fin an duh loh thu media-a lang chu thuthang hriatthiam tawk loh vang a nih thu ZPM Media & Publicity Dept. chuan a tar lang.
An thuchhuah tarlan danin, LMC hi India ram danpui 74th Constitutional Amendment Act in a phut anga mipui thlan, mahnia khawpui inrelbawlna (Urban Local Body) hranpa nei tura din a ni a. Central sorkar leh state dangte pawhin khawpui enkawlna kawnga an kalpuina a nih angin, central scheme (SBM, PMAY-HFA, AMRUT, NULM) leh hmasawnna hna hrang hrangte chu Aizawl AMC ang bawkin ULB kuta hlan chhoh zel tum a ni.
Lunglei DUDO office hi LMC awm hmaa lo enkawltu mai a nih avangin, LMC a lo phuisui takah chuan hna leh scheme staff-te hi LMC kuta hlan a, DUDO office hi chhunfin lova LMC kuta hmasawnna hna hlan chu hmasawnna rahbi thar zawk a ni tih tar lan a ni.
He ruahmanna hian LMC-a sanctioned post awm sa hnawhkhahna atan DUDO staff nghet pahnih/pathumte hman a tum lo va, mamawhna zualpui phuhru tura attached staff anga awm hrih tur an ni.
DUDO office-ah technical staff an awm loh avanga Aizawl atanga project vil thinte chu LMC kut a tlen hnuah hmun leh hmunah tha zawka enkawl a ni dawn a, Tlabung ang khawpui te pawh DC emaw SDO (C) office kaltlangin enkawl chhunzawm zel a ni dawn a ni.
Municipal cadre hran siama LMC thuam that zel sorkar hmathlir hi hrethiam a, Lunglei leh Chhim bial hmasawnna tura thawhpui zel turin Lunglei NGO Co-ordination Committee leh mipuite ZPM chuan an sawm tih an tar lang.