Aizawl: Larsap General (Dr) Vijay Kumar Singh chuan Ningani khan Lok Bhavan Conference Hall-ah Commerce & Industries leh Home department hotute a kawm a, ramri behchhan sumdawnna tihchangtlun dan tur leh hmachhawp hrang hrangte a sawipui.
Larsap chuan nakkin zel ngaihtuaha ramri behchhan sumdawnna tihchangtlun a pawimawh thu leh tun atanga lo inpuahchah lawk a tul thu a sawi a, insumdawntawnna kawngah harsatna a awm loh nan ruahmanna leh inkaihhruaina mumal siam a ngai a ni, a ti.
Nalkin lawka kawngpui tha leh rel kawngte ramri thlenga siam a nih dawn avangin he project zawh hun nghak lova a remchan lai leh hna thawh awlsam hunlaia a tul ang angte bawhzuia lo inrinlawk diam a tul thu a sawi a, official-te chu theihtawp chhuah chhunzawm zel tura chahin puih a inhuam reng thu a hrilh bawk.
Thutkhawmah hian Border Haat, Land Custom Station, Integrated Check Post leh Land Port hmalakna leh harsatna tawhte sawi ho a ni a, Joint Working Group-in ruahmanna huam zau duangin thuneitu sang zawka thlen ni se tiin rel a ni.
He hunah hian Commissioner & Secretary to Governor Vinod P. Kavle, Commerce & Industries Secretary Dr. H. Lianzela, Home Secretary Vanlalmawia leh official dangte an tel a ni.