Chief Minister Lalduhoma, finance minister ni bawk chuan sum leh pai enkawl zui that a nih avangin kum kalta khan Mizoramin SASCI Part IX hnuaiah incentive Rs vbc 350 a dawn tawh thu a sawi.
Ningani khan a pisa-ah Mizoram sorkar sum enkawlna lama digital kalphung thar pali — Mizoram Integrated Works Accounts System (MIWAS), e-Budget Module, e-Sanction Module leh 100% Direct Benefit Transfer (DBT)-te chief minister hian a tlangzarh a; MIWAS hmanga bill hmasa ber a pass nghal.
Minister Vanlalhlana, F. Rodingliana, CM Adviser TBC Lalvenchhunga leh official-te telna inkhawmah chief minister Lalduhoma chuan he hmalakna hian sorkar sum enkawlna kawngah langtlang leh dik taka sum hmanna leh eirukna venna tha tak a thlen dawn thu a sawi a. Sum leh pai enkawl zui that a nih avangin kum kalta khan Mizoramin SASCI Part IX hnuaiah incentive Rs vbc 350 a dawn tawh thu leh kum 2026-27 chhunga SASCI Part IV leh IX hnuaia Rs vbc 650 vel hmuh leh a beisei thu a sawi a; Administrative Approval hmuh atanga thla thum chhunga tender tichhuak vek tawh tura duh a nih thu a sawi bawk.
Digital Financial Management hawn tak zinga MIWAS hian Cheque System nuai bovin works department paruk (PWD, PHE, P&E, IWRD, EFCC leh LRS&WC)-te sum hman dan felfai zawkin a enkawl dawn a ni.
e-Budget Module hmangin online-a budget proposal buatsaihin chhut sual leh thehluh tlai a veng dawn a, e-Sanction Module hmangin sum hman phalna online-a buaipui tawhin budget bak hman palh a veng bawk ang.
100% DBT hmang hian state scheme hrang hrang (thlai thar leina, bana kaih, power subsidy)-a sum pekte chu Treasury-in bill a pass hnuah beneficiary-te bank account-ah direct-a thawn vek a ni tawh dawn a ni.