Aizawl: BJP Mizoram Pradesh chuan Inrinni khan an state office Mipui Run, Upper Republic-ah thla khat awh midang tana luanchhuahna campaign ‘Seva Sankalp Abhiyan’ kharna hun an hmang.
State Vice President JB Rualchhinga chuan he campaign chhung hian Mizoram pumah thisen pek runpui te, fahrah enkawlna hmun tlawh leh ei tur hlan te, faina beihpui leh thingphun hnatlang te, leh zirlai intihsiakna hrang hrang te kalpui a nih thu a sawi a. Anganwadi thawktute chawimawina leh naupangte ei tur sem bakah kum 70 tling chin tan PM Health Care Golden Card a thlawna siamsak a nih thu leh he card hi BJP Office-ah a thlawna la siam chhunzam theih zel a nih thu a sawi bawk.
State General Secretary leh Convener ni bawk Delson Notlia pawhin BJP chu political party dangte social media-a an inbeih lai a taka mipui rawngbawlna hnathawka inhmang reng an nih thu sawiin, Mizoram mipui hnenah sorkarna an pe a nih chuan Mizoram tan tam tak an tih theih tur thu a sawi lang bawk a ni.