Aizawl: October 16 atanga 18, 2026 chhung hian Serchhip Leisekawt Field-ah Ram Pum Huap Kohhran Pavalai Pawl Intawhkhawm vawi 7-na hlawhtling taka neih a ni.
He intawhkhawm thupui atana hman ‘Krista Sipai Huaisen’ tih chungchang hi Pathian thu sawi tura ruat hrang hrangte hneng atangin ngaihthlak a ni.
Program ruahman lawk angin, Zirtawpni zan inkhawmah Rev. B. Zohmangaiha, Synod Secretary-in Pathian thu a sawi a. Inrinni chawhma inkhawmah Rev. JC Lalramliana, Revival Director-in Pathian thu sawiin, chawhnu lamah zaikhawmpui neih a ni a, zan inkhawmah Rev. F. Lalrinnunga, Committee Member-in thu a sawi bawk.
Intawhkhawm tiakni, Pathianni chawhma inkhawmah Rev. Dr. V.L. Luaia Hranleh, Senior Executive Secretary-in Pathian thu a sawi a, chawhnu inkhawmah Rev. R. Lalrosiama, Committee Member-in thu sawiin, zan inkhawmah Synod Moderator Rev. John Raldosanga’n Pathian thu a sawi bawk a ni.
Inkhawm hrang hrangah hian Mizoram Synod Choir bakah bial leh kohhran hrang hrang Pavalai zaipawl ten Pathian hla sakin Pathian chawimawina an hlan thin a ni.
Synod Revival Department enkawlna hnuaia awm Kohhran Pavalai Pawl Intawhkhawm hi pandal-a neih a tum hnihna a ni. Tun tumah hian palai in report 4,890 awmin, langa intawhkhawm chhim an awm nual a ni.
Kohhran Pavalai Pawl hian ‘Krista tana nun’ tih chu thupui berah hmangin, midangte Krista hnena hruai te, Kohhran hmalakna tawiawm te leh Kristian chhungkaw tha din tura tan lak te chu an thiltum ber a ni.
Inchhiarna hnuhnung ber atanga a lan danin, tunah hian KPP hi kohhran 698-ah leh bial 167-ah te din a ni tawh a, ram pawna tualchhung kohhran 5-ah din a ni bawk.
Mizoram pumah Kohhran Pavalai Pawl member 52,576 an awm mek a ni.