Kanan Branch YMA-in an din champha vawi 53-na lawmna chu Kanan Middle School tualzawlah Inrinni zan khan an hmang a, Aizawl West II bialtu MLA leh minister ni bawk, Lalnghinglova Hmar chuan khuallian niin a hmanpui.
MLA chuan sorkar leh CYMA tangkawp hmalakna avangin heroin no. 4 vang ta deuh mah se, ganja leh khuh damdawi hmanga ruihhlo ti tleirawl leh naupang an la tam avangin fimkhur a, inthiarfihlim tlat turin naupang leh thalaite a chah a. Nu leh pate pawh an fate fimkhurpui tur leh YMA te pawh ruihhlo do kawnga tan la chhunzam zel turin a chah bawk.
Zirna a pawimawh thu sawiin, naupangte chu lehkha thiam ngaihpawimawh tak taka zir turin a fuih a, Rising Day lawmna hmun Kanan Middle School tual infiamna hmunpui ber chu thengthaw nuam taka hman a nih theih nan a chung khuhna tur sum dah a nih tawh thu leh kumin ngeia hna tan tum a nih thu a puang bawk.
Kanan Branch YMA hian a thla khat chhung vel infiamna hrang hrang hmangin an dincham hi an lawm a. Inrinni zan khan a lawmna pui ber hi session hnihah then niin, session hmasaah vengchhunga zirlai tithate chawimawina leh MBOCWWB hamthatna chungchang inzirtirna neih a ni a, session hnihnaah concert hlimawm tak hmangin Rising Day lawmna hi hlawhtling takin an khar a ni.