Aizawl: MZP hruaitute chuan School Education Minister Dr. Vanlalthlana chu Zirtawpni tlai khan a pisa-ah hmuin, zirlaibua Mizo hnam chi peng hrang hrang chanchin telh turin an thlen.
An inkawmnaah hian MZP hruaitute chuan college hrang hrangte mamawh bus ngaihtuahsak te, Mizo zirlaiten harsatna an tawh thin avanga Mizorama Computer Based Test (CBT) exam centre dah belh te, Zofate inpumkhatna atana zirlaibua Mizo hnam chi peng hrang hrang chanchin telh leh Mizo tawng dik tak hman a nih theih nana hmalakpui te chu an thlen a ni.
Heng bakah hian October 27, 2026-a ‘Zirlaite Ni’ leh MZP din champha ni bawk chu sikul hrang hrangah hmanna hun neih a nih theih nan leh college SU hruaitute buaina tawh hrang hrang chungchang an thlen bawk.
School Education Minister Dr. Vanlalthlana chuan college bus mamawhte ngaihtuah mek a nih thu leh driver nei sate an ngaihtuah hmasak tur thu a sawi a; CBT exam centre atana hman tur computer 600 chuang lei belh ruahman a nih tawh thu a sawi bawk.
Minister chuan zirlaibu-ah Mizo hnam chi peng hrang hrang chanchin telh an tum thu leh Mizo tawng dik tawk lo awm thinte pawh siamthat a nih tawh thu MZP hruaitute hi a hrilh a ni.