King Charles III chuan Burmese hruaitu hren mek, Aung San Suu Kyi-i chu lehkhabu pahnih a thawn tih Myanmar-a sipai sorkar chuan a sawi a, thuneituten lehkhabu leh lehkha la hawn loh an pe lai thlalak pawh Thawhtanni khan an tichhuak.
Kum 81 mi ni tawh, Suu Kyi-i hi kum 2021-a sipaiten a sorkar an paih thlak hnuah hren a la ni ngar ngar a, a lakah thubuai tam tak an siam bawk.
Sipai hotu, Min Aung Hlaing-a chuan an ram inthlan zalen lo leh fair lo tak nia sawi hmanga president-a a inthlan tlintir hnuah ram dangin Myanmar an enhranna tihtawp tumin theihtawp a chhuah mek.
Khawthlang ramten an ram tlawh tura an duh loh leh a mihringpuite laka dan bawhchhiaa puh, Min Aung Hlaing-a hian Asia khawmualpuia ram dangte tlawhin US pawh a be tawh bawk.
Suu Kyi-i hnena British lalpain lehkhabu a pek hi British gardener pahnih, Bridget Elworthy leh Henrietta Courtauld te ziah, ‘Soil to Table’ leh nikuma London-a exhibition catalogue, ‘Soil: The World at Our Feet’ te a ni.
Tharum thawh lova Myanmar-a mipui rorelna a awm theih nana a beih avanga kum 1991-a Nobel Peace Prize hlan, Suu Kyi-i hi an hrenna hmunah hian lehkha a chhiar nasa a, a bik takin sakhaw thil leh khuarel a chhiar uar.
Thawhtannia thlalak tihchhuahah hian Suu Kyi-i hi Burmese incheina hring dal deuh leh olive tawng pawnfen nen a awm a, kawr var ha mipa pahnih nen dawhkan an kilho a ni.
A hriselna dinhmun leh eng nge an sawipui engmah sawi lan a ni lo.
Suu Kyi-i hi sipai sorkar court-in kum 33 tang tura hremin June thla atang khan house arrest-in a dah.
August khan sorkar chuan International Committee of Red Cross aiawhte nena an inkawm thlalak a tichhuak a, hei hi a hma kum hnih leh a chanvea a fapa, Kim Aris-a a thawn hnua ram dang mi nena an inbiakna hmasa ber a ni.
London-a awm, Kim Aris-a hian kum tam chhung a nu chhuah theih nan a bei a, Red Cross aiawhten an hmu leh a nu pawh thlalak atanga ‘hrisel that hmel’ taka a lan avangin a lawm hle a ni.