Manipur Police chuan Thawhtannia Sunulok Hill-a pawikhawihna thleng, mi pathum thihna leh mi dang pathumin hliam an tawrhna kaihhnawihah mi pathum an man.
Silai 12, a mu 1,095 leh puak thei dang tam tak man a ni bawk tih Additional Director General of Police (Law and Order) Lhari Dorjee Lhatoo, IPS chuan Thawhlehni khan a sawi.
Police Headquarters, Mantripukhri-a thuthar lakhawmtute a kawmnaah Lhatoo-a chuan mi man zinga pahnih hian thu an zawh tawh chinah pawi khawihna kha an tihah an pawm tih a sawi a. Pakhat dang hi chhui zui mek a ni a, mi dang inrawlhte pawh thlithlai mek a ni tih a sawi.
An mi man pathumte hi eng hel pawla tel nge tih erawh an la hriat loh thu police hotu hian a sawi.
Heng mite hi Thawhtanni zan atanga Manipur Police, Central Reserve Police Force (CRPF) leh CoBRA team tanghoten S Highland Court leh a bul vel khua, Sagolmang Police Station an dap leh thu an dawn bawhzuia hma an lakna atanga an man an ni.
Imphal East-Kangpokpi district inrina, Nongsum Hill bul lawka Uyumpok bula thing fawm pathumte hi kah hlum an ni a. He thil thleng duh lohna hi nasa taka lantir niin ruangte hi Imphala chief minister chenna ina lain rang taka hma lak an phutna an lantir a. Bialtu MLA pawhin helho nena inbei lo tura inremna, Suspension of Operations (SoO) chu hlip turin a phut bawk.
Hun eng emaw chen boruak a daih hnuah he thil thleng hian Meitei-Kuki inkara a tihtan thar leh hlauh a ni bawk.
ADGP chuan ralthuamte hi an mi mante sawi atanga an hai chhuah a ni a. INSAS rifle, M16 rifle, A1 rifle, AK-47/Type-81 rifle, 7.62 mm sniper rifle leh 5.56 mm Heckler & Koch rifle pakhat theuh, 12-bore single-barrel pathum, Lethod gun leh tualchher rocket launcher pakhat ve ve an ni.
Puak thei an man zingah hian TNT slab, PK explosive, gunpowder, Lethod shell, tualchher Pompi bomb, M61 rifle grenade, Chinese hand grenade, tualchher mortar leh detonator pathum a ni.
Thawhlehni vek khan Manipur Police, CRPF, CoBRA, Border Security Force (BSF), Assam Rifles leh sipai tanghoten Sinai camp an luhchilhnaah mi 17 an man bawk tih ADGP chuan a sawi.
An mi mante hi Kuki National Organisation (KNO) leh Kuki Liberation Army (KLA)-a tel an nih an ring a, finfiahna erawh an la nei thei rih lo tih Lhatoo-a chuan a sawi.
Thoubal Police, CoBRA, Rapid Action Force (RAF), CRPF leh Assam Rifles tanghoten Khangabok-Sangaiyumpham huam chhung an dap bawk a. In 146 luh chhuahin mi 300 chuang thu an zawt fiah a, mi pali an man.
Double-barrel gun an man bawk.
Lhatoo-a hian mipuite chu police leh venhim hna thawktute thawhpui tur leh mahni thua dan lekkawh mai lo turin a ngen a. Thu chiang lo an hriatte thehdarh zung zung lo turin a ngen bawk.