Ukrainian hruaitu leh US President Donald Trump-a inkar a that vak loh laiin US special envoy Steve Witkoff-a leh Volodymyr Zelensky-a te chu Oslo-ah an inkawm.
Norwegian Prime Minister Jonas Gahr Støre-a chuan Zelensky-a hian Oslo leh an thenawm, Finland chu ‘Ukraine-in hun khirh tak’ a tawh laia US leh an thawhpui European-te nena inbiakna siamsak turin a ngen niin a sawi.
Hemi hma hian US Secretary of State Marco Rubio-a chuan Ukrainian-te chu US-in Kyiv hnena intelligence a pek tawh loh avangin an thi mek nia a sawi chu a dik loh thu a sawi.
Zelensky-a military adviser lawk, Serhii Beskrestnov-a pawhin BBC hnenah US-in warning a pek loh chuan nunna tam tak hloh thin a nih thu a sawi a. “A chang chuan beihna lo thlen hmain information a awm a, a chang chuan a awm lo,” a ti.
Kyiv leh US inkar hi tun hnaiah a tha vak lo va, Trump-a phei chuan Ukraine-in president thar an neih a hun ni hialin a sawi.
Zelensky-a hian Witkof-a nena an inbiak hma hian Norwegian prime minister leh Finnish President Alexander Stubb a be hmasa a. Video link hmangin Trump-a makta, Jared Kushner-a’n inbiaknaah hian a zawm bawk.
Støre-a chuan inbiakna hi inkungkaihnaah ‘kawng tha zawk’ a awm theihna atan a nih thu a sawi a. Parliament-a thuthar lakhawmtute hnenah indona chu palai leh muanna hmanga a awm theih a duh tih a sawi.
Zelensky-a hian Oslo-a hian Ukraine-a intelligence chief Rustem Umerov leh an hruaitu thawm na tak, Davyd Arakhamia-a a hruai a, tun thla tir khan Miami-ah Witkoff-a leh Kushner-a pawh an lo be tawh.
Trump-a chuan tun hnai khan Moscow atangin diesel lak luhna tur inremna a siam a, hei hi Ukraine chuan a haw hle a, indona atana sum an siamna hmanrua turah a ngai.
Oslo-a an inbiak hma lawk hian Zelensky-a chuan Rubio-a nen ‘tha taka inbiain’ US atanga warning hmuh hma, missile interceptor leh SpaceX hnuaia Starlink internet network chungchang an sawi dun tih a sawi bawk.
Zelensky-a hian inbiak zawha thuthar lakhawmtute kawmnaah Norwegian leh Finnish hruaitute a zui ve lo va, Witkoff-a pawh a tel chuang lo bawk.
Russia chuan drone hmangin Ukraine a beih chhunzawm zel bawk a, Thawhlehnia an beihnaah mi 10 vel an thi niin Ukrainian thuneitute chuan an sawi a, pali hi Kyiv leh khawpui region-a mi an ni a, khawchhak lama Donetsk region-ah mi pali leh Dnipro khawpuiah mi pahnih an thi bawk niin an sawi.