Aizawl: Sports & Youth Services Minister Lalnghinglova Hmar chuan khualzin pung mekah taxi khalhtuten mawhphurhna sang tak an nei tih a sawi.
Thawhlehni zan khan Mizoram Taxi Association kum 10 tlin lawmna atana buatsaih taxi khalhtute tana futsal inelna chu ITI Vengah Lalnghinglova Hmar hian a hawng a; Asian Games hmeichhe hockey gold medalist Lalremsiami Hmar leh Lalthantluangi ten an tawiawm.
Lalnghinglova Hmar chuan taxi khalhtute chu eizawnna pawimawh tak chelhtute an nih avangin ram leh hnam hmel lanna an nih thu a sawi a, “Khualzin pung mekah pawh hian taxi khalhtute hian mawhphurhna sang tak in nei a, khualzinten an tawn hmasak ber an nih thin avangin ram leh hnam hmingthat leh hmingchhiat in kutah a awm lian hle a ni,” a ti.
Taxi khalhtute chu zing chhun zan zawma hnathawktu an nih thin avangin hriselna atan a khat tawka infiam a mamawh thu leh, thlan titla ve fo turin a chah a, an hriselna ngai pawimawh turin a fuih.
Sports minister chuan, “Mizo mipa a hun hmaa thi an tam em em a, hei hi hriselna ngai pawimawh loa nun dan inthlahdah avang te, zu leh ruihtheihthil lama kal nasat nghawng a ni,” a ti a, Mizo mipaten nun an uluk zual a tul thu a sawi.
Mizoram Taxi Association kum 10 tlin lawmna futsal tournament-ah hian Aizawl hmun hrang hrang atangin team 45 an tel a; Minister hian infiamna hmanrua bakah sum leh pai a hlan a ni.