Aizawl: Mizoram Home Secretary hlui, H. Lalengmawia chu Nilaini Mizoram State Chief Information Commissioner atan lak luh a ni.
Aizawl-a Lok Bhavan-a lakluh inkhawm hi Chief Secretary Khilli Ram Meena-a’n larsap ruatna notification chhiar chhuakin a tan a, hemi hnu hian larsap chuan H. Lalengmawia hi rinawmna thutiam chhamtirin mawhphurhna a hlan a ni.
He lakluhna inkhawmah hian PWD Minister Vanlalhlana, AH&Vety Minister C. Lalsawivunga, Forest Minister Lalthansanga, Leader of Opposition Lalchhandama Ralte leh mi pawimawh dangte an tel a ni.
H. Lalengmawia hi kum 1991 khan Mizoram Civil Service (MCS)-ah a lut a, March ni 19, 2014 khan Indian Administrative Service (IAS)-ah hlankai a ni.
Sorkar hna a thawh chhung hian hna pawimawh tak tak a chelh tawh thin a, heng zingah hian Joint Chief Electoral Officer, State Protocol Officer leh Director of School Education te a tel a. Hei bakah department pawimawh hrang hrang — Home, Environment, Forests & Climate Change leh Health & Family Welfare-ah te commissioner & secretary hna a lo chelh tawh bawk. Kum 2024 khan thla khat chhung Mizoram chief secretary hna a lo chelh tawh bawk a ni.
Sorkar rawngbawlna leh administration-a a thawh hlawk avangin kum 2025 khan ‘Chief Minister’s Award for Excellence in Public Administration’ hlan a ni a. November 30, 2025 khan sorkar hna atangin pension-in a chhuak a ni.