Mizoram cricket-a hmeichhe senior team chuan Nagaland-a Senior Women’s T20 Trophy Plate 2026-27 tournament khel turin Ningani khan an chhuak a, Thawhtanni atang hian an khel tan ang.
Mizo nulate hian inelna thlengtu, Nagaland hmachhawn hmasa berin Arunachal Pradesh, Bihar, Manipur leh Meghalaya nulate nen an inkhel zui ang a. An inkhel chhuah hnuah a sang pahnihin November 4-ah final an khel dawn a ni.
Mizoram hian inbuatsaihna hun tha tak an neih avangin champion ngei tumin tournament hi an hmachhawn dawn tih Cricket Association of Mizoram (CAM) chuan a sawi a. Season liam ta khan group stage-ah Nagaland nen an point inang chiahin net run rate-a an phak loh avangin final an lut pha lo va, kumin erawh sang zawk thlen ngei an tum hle a ni.
Plate hi inelna hniam zawk a ni a, champion hian season tharah a thiam rual, Elite an kai thin a ni.
Senior team-ah hian Board of Control for Cricket in India (BCCI) danin a phal angin state pawn (guest) player pathum lak theih a ni a. Tun season-ah hian CAM chuan West Bengal atangin Indrani Roy, Mumbai atangin Unnati Sunil Naik leh Maharashtra atangin Shivani Wasudeo Dharne te la an ni.
MIZORAM FIXTURE:
Oct. 26, 2026 – Mizoram vs Nagaland
Oct. 27, 2026 – Mizoram vs Arunachal Pradesh
Oct. 29, 2026 – Bihar vs Mizoram
Oct. 31, 2026 – Manipur vs Mizoram
Nov. 02, 2026 – Meghalaya vs Mizoram