Louis van Gaal-a chuan kum 2016-a Manchester United-a a hna a chân chhan chu Manchester City thil sual tih vangah a ngai.
Van Gaal-a hi Sir Alex Ferguson-a chawlh hnua club enkawltu pahnihna niin, David Moyes thlaktu a ni a. Manchester United chu Champions League khel pha tura a kaihhruai hnuah a kum hnihnaah a tinawn thei ta lo a, FA Cup lakpui mah se an bân a ni.
Manchester United chu Champions League-a khel thei dinhmunah an ding tawh a; mahse, kum thar atangin an tlahniam ta a, season tawp dawn hnaihah West Ham United lakah tlawmin goal difference-ah Manchester City chu an inlehpelhtir a, palina dinhmunah City an hlang kai ta zawk a ni.
Champions League khel tura an inngaih hnua tling ta lova an aiah an thenawm club an tling ta chu a bân chhan lian ber a ni tih Van Gaal-a chuan a sawi chhuak.
Dutch coach chuan, “Ka tan chuan kum 2016-a Champions League khel tura kan tling zo lo kha Manchester United atanga min bân chhan bulpui ber a nih bakah kha mi vang khan hrehawmna leh harsatna pawh ka tawn hnem phah hle a ni,” a ti.
Thla liam taah khan Premier League dan 114 bawhchhiat vangin Manchester City chu thiam loh chantir an nih thu an lo puang tawh a. Panel hian kum 2009 leh 2018 inkarah £ maktaduai 900 chuang dik lo takin an ziak tih an hmu chhuak a ni.
Manchester City chuan an thiam lohna an neih lohzia tilang turin finfiahna tha tak an neih thu leh sponsorship sum chu club neitute atang ni lovin, Abu Dhabi sorkar atanga an hmuh a nihzia tilangtu lehkha pawimawh an neih thu an sawi a, an laka thutlukna chu an khing let mek.
Mi pathum awmna commission chuan an sum hmuhna thup bo tuma Manchester City-in sum dinhmun an phuahchawp mai a ni tih hmuh chhuah a ni tiin thutlukna an siam a; mahse, panel dangin an thubuai chu an tana tha tura an her remsak theih an la beisei tlat a ni.
Hrem theihte chu pawisa chawitir, player lak luh khap, point paihsak leh Premier League atanga hnawhchhuah te niin, he mi hun chhunga title an lak te pawh hlihsak vek ni se tia rawtna a awm bawk a ni.