Aizawl: Mizoram Pradesh Congress Committee (MPCC) chuan Ningani khan Serchhip khawpuiah ‘Vote Humhim La, Ram Chhanhim Rawh’ (Vote Bachao – Desh Bachao) campaign an nei a, he hunah hian MPCC President Lal Thanzara chuan Uniform Civil Code (UCC) tihthlawhtlin tumtu BJP leh RSS-te do turin Mizo leh Kristian mipui a sawm.
Lal Thanzara chuan India ram chu Hindu lalrama siam tuma BJP leh RSS-ten kum 12 chhung ro an rel mek thu sawiin, Election Commission hmanga Electoral Roll atanga voter vaibelchhe 13 chuang an paih mek chungchangah Rahul Gandhi hovin Congress party-in nasa takin an dodal thu a sawi a. Chief Election Commissioner Gayanesh Kumar-a ban thlengin an nawr zel dawn tih a sawi.
Tuna Mizorama sorkar mek leh Serchhip bialtu MLA chu BJP sawimawitu leh thawhpui tumtu a nih thu a sawi a, an thutiamte hlen lo sorkar an nih thu a sawi bawk.
He hunah hian Dr. A. Chella Kumar, AICC Incharge of Mizoram pawhin thu sawiin, BJP leh Narendra Modi-a kaihhruai sorkar chuan mipui dikna chanvo leh inthlanpuia vote thlak rights chhuhsak an tum mek a ni, a ti.
MPCC Vice President Zodintluanga Ralte pawhin thu sawiin, ZPM sorkar hnuaia kawngchhiat dante leh sorkar kalphung hrang hrang sawiselin, ZPM sorkar chu ZNP sorkar tiin thlak a ni mek a, ZPM sorkar nana thawh hlawk em em te ZNP sorkarah an beidawng mek tih a sawi a. Sorkar thlak tur hian Congress party an kir leh dawn tih a sawi bawk.