Aizawl: BJP Mizoram chuan Congress party-in Serchhipa an hun hmannaa an auhla ‘Vote humhim la, Vote chhanhim rawh’ tih hi mipuite bumna leh dik tawk lo a ni tiin, Congress hotupa Rahul Gandhi-a’n ‘vote ruk’ a lo sawi thin pawh Supreme Court-ah finfiahna an thlen thei lo a ni, a ti.
Nimina an thuchhuahah BJP Mizoram chuan, SIR chungchangah pawh voters thi tawh leh hmun danga pem ta, dan loa vote nei te chhui chhuaha inthlan thianghlim tak kalpui nana hmang a nih thu sawiin, SIR hi kum 1951 leh 2004 inkar pawhin ECI-in vawi riat lai a lo kalpui tawh thin thu an tar lang.
BJP Mizoram chuan Congress MP Angomcha Bimol Akoijam chungchang pawh tar langin, a zirlaite laka a mualphona hliahkhuh nan leh mipuite laka tlaktlum a tum vang maiin kawngzawh an huaihawt a. Congress sorkar hun laia emergency puan te, chanchinbu mi hrekte leh democracy pawngsual a lo nih tawh dante tar langin, democracy humhim duh tak tak an nih chuan MPCC-te chu an party chhuahsan mai turin an chah.
Prime Minister Narendra Modi leh Home Minister Amit Shah-te kaihhruaina hnuaiah India chu ralmuang tak leh economy thang chak ber pakhat a nih bakah, mipui huapzo hmasawnna an hmuh thu BJP Mizoram chuan an tar lang a. Congress party-in chhungkaw rorelna an kalpui zel chu hlih a nih theih nan leh mipui rorelna dik tak tihchak a nih zelna turin ram pum huapin ‘Loktantra Bachao, Bheedtantra Hatao’ (Mipui Rorelna Chhanhim la, Chhungkaw Rorelna um bo rawh) tih thupui hmanga beihpui thlak an tum thu an tar lang bawk.