Tuichangral Volleyball Club-in set hnih la hmasa zawk mah se Anastasia Electric Veng Volleyball Club tan Zomuansanga’n a theihna lantirin MUCO Bank Ltd MVA Season Opening Tournament mipa final-ah 3-2-a hnehna changin nomawi nen season bul an tan.
A zuan san em avanga ‘Khawhai Airline’ tia an sawi thin, Zomuana hian Inrinni zana Electric Veng YMA Indoor Stadium, Aizawla inkhelah a hnung leh a hma atangin vawi 27 vaw tlain point 11 hloh tel mah se Anastasia tan champion-pui thamin a khel a, 18-25, 23-25, 25-23, 25-23, 15-12-in a chakpui.
Pro club-te chauh inelna tournament final-ah hian Tuichangralin Khawhai spiker Saidingpuia Sailo leh Khawbel thiampuipa, Johan Vanneihsanga hova tha taka bul tanin harsa vak lovin set hmasa ber an la a. Set hnihnaah pawh talbuai zui lutuk lovin an la bawk.
Set thumna atangin inelna thlengtu veng club an insiam tha a, player thlakin an khelhna (position) an siksawi hret bawk a, Zomuana a langsar zual sauh va. Harsa angreng taka set hnih la zawnin deciding set thlengin nghet takin an khel tluan zui a. Tuichangral tan an spiker pahnihin point 58 vaw chhuak mah se an chakpui zo ta chuang lo a ni.
Zomuana hi season liam ta, 2025-26 khan a tlahniam deuh va, season thar atan nasa zawka inbuatsaihin a rah pawh inelna hmasa berah a lang nghal a. Tournament chhunga vawi nga khelhah vawi 109 vaw tlain tihsual vawi 49 neiin Best Spiker-ah thlan a ni.
Inrinni zan veka hmeichhe final-ah Hrangbayanz Volleyball Club chuan set hmasa pahnih an hloh hnuah Tuichangral lakah 3-2-in hnehna an chang bawk.
Set hmasa berah Hrangbayanz hi talbuain point 10 chauh an hmu ve hman a, set hnihnaah insiam tha hret mah se set an la zo lo leh a. Set thumna atang erawh Tuichangral an che hman meuh lo a ni ber a, awlsam taka set hnih an lak zawn hnuah set thumna pawh an talbuai zui duh tawh lo va, 13-25, 20-25, 2510, 25-13, 15-12-a hnehna changin nomawi nen season bul an tan.
MUCO BANK Ltd. MVA Season Opening Tournament 2026 Final Result
HMEICHHIA
Hranbanyanz VC bt. Tuichangral VC (3-2)
13-25, 20-25, 2510, 25-13, 15-12
Best Spiker – Elisian Medai, Hrangbanyanz VC
Best Setter – Lalrempuii, Tuichangral VC
Best Receiver – Daisy Lalmuanpuii, Hrangbanyanz VC
MIPA
Anastasia Electric Veng VC bt. Tuichangral VC (3-2)
18-25, 23-25, 25-23, 25-23, 15-12
Best Spiker – Zomuansanga, Anastasia Electric Veng VC
Best Setter – David Lalramhmachhuana, Tuichangral VC
Best Receiver – Lalrinngheta, Tuichangral VC
Best Blocker – Zosangzuala, Anastasia Electric Veng VC