Aizawl: Council of Churches in Mizoram (CCM) Inkhawmpui lian vawi 2-na chu Inrinni khan Lunglei Venglai BCM biak in-ah neih a ni a. He inkhawmpuiah hian kum 2026–2028 chhunga CCM hruaitu thar turte thlan nghal an ni a, President atan Rev. Dr. VL. Laldingliana (BCM) chu ruat a ni. Kum 2028-a Inkhawmpui lian leh a thlengtu tur atan Evangelical Church of Maraland (ECM) ruat a ni bawk.
CCM Khawmpui hian zuk leh hmuam, ruihhlo do kawngah hma lak nise an ti a, ruihhlo tawlh leh hetianga sumdawng, sorkar leh court-in thiam loh a chantirte chu Kohhran pawhin rawngbawlnaah hmang tawh lo tur leh, an awmna kohhranin a thunun te chu CCM member kohhrante zawng zawngin an kohhranah lakluh loh ni se an ti a, ruihhlo ngaite puala rampum huapa tawngtai rual neih leh ruihhlo do pawlte sum leh pai hmanga tanpui nise an ti.
CCM Women Assembly (CCM-WA) leh CCM Youth Assembly (CCM-YA) din nise tiin an rel bawk a, Ramthar rawngbawlna, sikul leh damdawi in din chungchangah pawh rawngbawlna lo awm sa tawhna hmunah inbawhthuah lo va, harsatna a thlen loh nan kohhran dangte nen inbiakrawn hmasak thin ni se an ti a, mihring nuai khat chunglam awmna hmunah erawh indipdal lovin tu pawhin rawngbawlna an nei thei ang an ti.
Inneih chungchangah kohhran dangte nen inhriatthiamna tha tak neih nise, kohhran dang nula leh tlangval inneih dawnin inleh hmasak kher phut loh nise tih te pawh an rorel langsar ber berte zingah a tel a ni.
Kum 2026–2028 chhunga CCM President atan Rev. Dr. VL. Laldingliana (BCM), Vice President-te atan Rev. Chhuakhu Khitie (ECM) leh Rev. Lalrotluanga Darngawn (EFCI), General Secretary atan Rev. Dr. Lalhmangaiha (MPC), Joint Secretary atan Rev. H. Keneth Lalawmpuia (IKK), Treasurer atan Upa Lalthansanga (MPC) leh Finance Secretary atan Rev. Zion Varmawia Fanchun (LIKBK) te thlan an ni.