Senior Women’s T20 Trophy Plate group match inkhel hmasa berah Mizoram chuan inelna thlengtu, Nagaland chu wicket kuain an hneh a, Mizo nulate hian an vawm that zar zovin over 4.5 lek chhungin chak nana an mamawh an vaw chhuak.
Thawhtannia Nagaland Cricket Stadium, Sovima, Nagaland-a inkhelah hian Mizoram hi thum vawrah chakin vawm hmasak an thlang a, an tifuh hle a. Over 20 chhungin inelna thlengtu hian mi pakua hlohvin run 29 chiah an siam a, run 10 siam tling an awm miah lo va, run siam lova thi batter pathum an awm bawk.
Mizoram tan Lalnunmawii’n over li a vawmah run li chiah pein mi pathum a vawm thi a, player of the match-a thlan a ni a. Zothansangi’n mi pahnih vawm hlum bawkin ZD Lalnunhrili, Lalhriatpuii leh Unnati Naik ten wicket khat theuh an la bawk.
Mizo nulaten chak nana an mamawh run an umnaah over 4.5 chhungin an umpha a, wicket khat hlohvin opener Vanlalremtluangi’n run 11 a siam hman a, Indrani Roy-i’n run nga a siam hman bawk.
Mizoram hian Thawhlehni hian Sovima Cricket Ground-ah tho Arunachal Pradesh an hmachhawn zui leh dawn a. Bihar, Manipur leh Meghalaya te an hmachhawn zui bawk ang.
INKHEL KHAIKHAWMNA:
Nagaland – 29/9 (Over 20)
Lalnunmawii – 3/4 (Over 4)
Zothansangi – 2/4 (Over 4)
Mizoram – 30/1 (Over 4.5)
Vanlalremtluangi – 11* (14)
Ankita Bhongade – 9 (10)
Wicket kuain Mizoram an chak.