Harry Kane chu kum 2001-a Michael Owen-a’n a dawn hnua English player zinga Ballon d’Or dawng leh hmasa ber a ni ta a, London khawpuia Thawhtanni zana chawimawina semah khawvela mipa football player tha ber chawimawina hi a dawng a ni.
Bayern Munich striker kum 33 mi hi English zinga dawng thei pangana niin Stanley Matthews (1956), Bobby Charlton (1966) leh Kevin Keegan (1978 & 1979) ten an lo dawng tawh bawk.
Real Madrid leh France forward Kylian Mbappe chu pahnihna niin Barcelona leh Spain attacker Lamine Yamal chu pathumna a ni.
“Mi tam chuan, keimah ngei pawhin hetiang dinhmun hi ka thleng ang tih kan suangtuah ngai lo,” tiin Kane-a chuan Dazn hnenah a sawi.
“A bik takin ka hun hmasa lamah hniam lai leh san lai ka tawng nasa a. Tuna mi tam takte anga superstar ang hi ka ni ang tih ka lo suangtuah ngai lo,” a ti.
“Ka hun leh ka thawhrimna, ka ngaihtuah ngai lo ang taka thil lo thleng thinte pawh kal khumin mahni inrinna leh thawhrimna nen ka bei a. A sang ber thlengin hmasawn leh that zel dan ka ngaihtuah reng thin a ni,” a ti.
England manager Thomas Tuchel-a chuan Kane-a’n chawimawina a dawng chu ‘a phurawm’ tih sawiin a hlawhtlinna chu ‘chawimawina ropui tak’ a nih thu a sawi.
Prince William-a pawhin Tottenham Hotspur player hlui chu ‘captain ropui’ leh ‘player tha bik’ tiin a sawi ve bawk.
Kane-a hian season liam ta khan club tan vawi 51 khelhah goal 61 a thun a, Bayern player zinga seaon khata goal thun tam ber record a siam a. England tan a a inlan nen vawi 65 khelhah a vaiin goal 73 thunin mi dang tan vawi riat a siamsak bawk.
Europe-a league lian panga zingah ani anga goal thum tam an awm lo.
Goal tam tak a thun rual hian World Cup leh Champions League-ah a team chu semi-final bak a pelhpui zo lo ve ve thung.
Three Lions captain hi Bayern player zinga kum 1981-a Karl-Heinz Rummenigge-a’n a danw hnua Ballon d’Or dawng leh hmasa ber a ni.
Kane-a’n chawimawina a dawn lawmpui nan hian Thawhtanni zan khan Wembley-a a chung kual (arch) chu rangkachak rawnga chhit en a ni nghe nghe.
Hmeichhiaah Spain midfielder Alexia Putellas- hnenah Ballon d’Or Feminin hlan niin vawi thum a dawnna a ni a, dawng tam ber zingah a tel ta a. Kum ruk a zawnin Spanish nulate kutah chawimawina hi hlan a ni ta bawk.
Kum 33 mi, Putellas-i hi Barcelona captain niin Champions League-ah a champion a, 2025-26 season-ah nomawi pali lakpuiin July thla khan Women’s Super League (WSL)-a khel turin London City Lionesses a zawmsan.
Spain tana a khelhpui, Aitana Bonmati angin Ballon d’Or Feminin vawi thum a dawng ta a. Anni pahnih hian kum 2021 atang khan he chawimawina hi an dawng ta char char a ni.
Ballons d’Or hnuhnung paruk hi Spanish player pahnih hian an dawng ngar ngar a, Norway atangin Ada Hegerberg (2018) leh US atangin Megan Rapinoe (2019) te chu Spaniard ni lo zinga dawng an ni.