Aizawl: College of Nursing, RIPANS chuan an 26th Lamp Lighting and Oath Taking Ceremony chu RIPANS Auditorium, Zemabawkah Thawhlehni chawhnu khan an hmang a, he hun hi Environment, Forests & Climate Change leh Sericulture Minister, Zemabawk Bialtu MLA ni bawk Lalthansanga chuan khuallian niin a hmanpui.
Apollo School of Nursing Principal Lalhmingmawii kaihhruai inkhawmah B.Sc Nursing zirlai thar 55-te chuan bati chhi chungin Florence Nightingale Pledge thutiam an la a; heng zirlaite hi hmarchhak state pasarih, Sikkim leh PM Special Quota hnuaia Jammu & Kashmir atanga lo zirte an ni.
He hunah hian Mizorama Nursing College zirlaite clinical duty-na Civil Hospital, Kulikawn Hospital, MSCI leh ZMC Falkawn atanga zirtirna pe tha ber Best Preceptor Award mi paliten khuallian hnen atangin an dawng.
Kum 1996 atanga din, B.Sc atanga graduate 879 awm tawhin, M.Sc graduate 65 in an zir chhuak tawh bawk a, RIPANS hian nakkum session atangin Ph.D in Nursing hawn tumin hma an la mek a ni.