School Education Minister Dr Vanlalthlana chuan Zirlaite Ni leh MZP-in kum 90 tlin lawm kharna hun, Berawtlang Multipurpose Hall-ah Thawhlehni khan a hmanpui.
MZP hi sorkar lo khalh ngil tawhtu a ni tih sawiin Dr Vanlalthlana chuan, “Remna kan neih theih nan te, Zofate inpumkhat nan te, ramri humhalh nan te, hnamdangte chimrala kan awm loh nan te, Mizo faten technical seat kan hum theih nan te an thawhhlawk hle a, hma lam hunah pawh tha thawh zela theihtawp chhuah zel a ngai a ni,” a ti.
Zirlaite hi Zoram hmabak an ni a, danglamna siamtu, thil thar hmuchhuaktu, ram hruaitu an la.awm dawn, tuna awm mekte hi nakkin lawkah an ral zel dawn a, he ram hi an inhlanchhawng zel a ni. Mi hmasaten an hun laiin an lo humhim tawh a, an hun theuhah an humhima, thangtharte chenna tlaka an siam zel a ngai tih a sawi bawk.
Minister chuan MZP hruaitu tam zawk hi politics-a lut zui lem lo an nih avangin he pawl hi politics kailawn atan chauh hmang anga mi tam tak sawi thin chu a dik lo tih sawiin, “MZP lo hruai tawhtute zawng zawng chu zah an phu hle a ni,” a ti.
MZP President Dr C.Lalremruata pawhin thu sawiin sorkar hi a theih chin chinah MZP hian a thawhpui dawn a, a thlawp dawn a. Chutihrualin an dik lohna leh fel lohnaah erawh an dodal zel dawn tih a sawi a. Zirlai pawl inthlanah political party inrawlh a duh loh thu a sawi a. Zirlaiten pass ringawt ni lo va, chhawr tham thiamna neih a tul thu leh tuna zirlaite chu fing leh thiam intih avanga midang ngaihsan lohna rilru pu lo va, aia upate zah thiam tura chahin, an hriat loh zawng a awm pawha hrilh fingtu ni zawk turin a chah bawk.
Khuallian hian ‘MZP Souvenir’ buatsaih chu a tlangzarhna nghal bawk.