Ruihhlo kalkawng kan nih miau avangin hausa thut tam tak an awm a, hriat lem lova sumdawnna chhuanlama nei nung deuh deuh kan tam ta hle niin a lang.
Heng nei nung ta deuh deuh ho hi kohhran leh khawtlangah an tangkai fu a, thawhlawm pek kawngah an inhawng hle. Tin, ram pum huap pawhin an hming a langsar chho nalh nite pawhin a lang a, chiang taka man chhuah fak a awm loh miau avangin an la zalen duh fu bawk.
Tun hnaiah Enforcement Directorate (ED) lam chuan operation kalpuiin, Mizoram leh Myanmar lam mi ruihhlo hmanga sumdawng lian tak tak an rawn dapchhuak nawlh nawlh mai a, heng mite sumdawnna hi a lianin, an lo chheprelh nasa hle tih pawh a hriat theih. Rin phak bakin an kalkawng hi a lo lian a, an thurualpuite lah an lian hlawm hle bawk a ni.
ED lam hian rinhlelh bank account 991 an hrek (freeze) mek nia sawi a ni a, hei ringawt pawh hi tam tham tak a nih bakah, a kaihhnawih hi tam tak a la awm ngeiin a rinawm a, chak lehzuala an chet theih nan keini lam pawhin theihtawpa kan theih vena laia kan lo tanpui pawh a tul hle.
Ruihhlo kalkawng kan nih miau avangin kut kuangkuaha lo thu ringawt thei kan ni lo a, kan ram leh hnam him nan leh kan thalaite a hun lova an liam zawih zawihna veng tur hian tangrual ila, kohhran leh khawtlang kan thanharh a, ruihhlo leh a kaihhnawiha sumdawngte um tawm tura kan chet nat sauh sauh a va tul em.