Nagaland-a Senior Women’s T20 Trophy Plate group match hnuhnung berah Mizo nulate chuan wicket ngaa Meghalaya hnehin final an lut a, Nilainiah Bihar nen final an khel zui ang.
Nagaland Cricket Stadium, Sovima-a Thawhtanni chawhnua group league inkhel hnuhnung berah hian a chak zawk zawk final lut thei an ni a. Thum vawrah Meghalaya chakin vuak hmasak an thlang a, over 18 chhungin run 59 siamin an thi zo vek a. Lalhriatpuii’n over li a vawmah run sarih pein wicket thum a la a, phu takin player of the match lawmman a dawng.
Armed Veng, Aizawl nula, Hriatpuii hian an khelh hnuhnung ber, Inrinnia Manipur laka wicket 10-a an chak tum khan over li a vawmah run li chiah pein mi pali a vawm hlum a, player of the match chawimawina a lo la tawh bawk.
Meghalaya lakah hian Lalhmangaihsangi’n wicket thum tho a la a; ZD Lalnunhrili, Sandhia Rai leh Unnati Naik ten mi pakhat theuh an vawm thi bawk a. Khasi nulate zingah pathumin run 10 vaw chhuak tlingin run engmah siam lovin batter pali an thi thung.
Mizoramin chak tura an mamawh an umah over 13 chhungin mi panga thiin run 60 an tlin a, opener pahnih, guest player Ankita Bhongade-i leh Vanlalremtluangi ten run 18 ve ve siamin Vanlalruatpuii’n run 12 a thawk chhuak bawk.
Board of Control for Cricket in India (BCCI) hnuaia inelna hniam zawk, Plate-ah hian team ruk inelin an inkhelh kual chhuah hnuah a sang pahnihin final an lut a, champion-in season tharah a thiam rual inelna, Elite an khel zui ang.
Mizo nulate hi khelh ngaah vawi li hnehna changin hneh loh nei lo, Bihar chu a chung berah an awm a, Mizoramin an dawt a. Ningania kal taa an inkhelhah run 15-in Mizoram hian an hneh lo va, Nilaini chawhnuah final-ah an insu leh dawn a ni.
INKHEL KHAIKHAWMNA:
Meghalaya – 59/10 (Over 18)
Lalhriatpuii – 3/7 (Over 4)
Lalhmangaihsangi – 3/12 (Over 4)
Mizoram – 60/5 (Over 13)
Vanlalremtluangi – 18 (19)
Ankita Bhongade – 18 (20)
Wicket ngain Mizoram an chak.