Zee Entertainment & Enterprises (ZEEL) leh DD Sports chuan 2026-27 Indian Football League (IFL) inkhel hrang hrangte chu live-in an tichhuak dawn tih Zirtawpniah khan an puang.
He thutlukna hian IFL tan entu mipui a huap zautir lehzual tura beisei a ni a, season hman zawh taka TV hmanga entu maktaduai 17.56 awm tawh chu khumin record thar siam an tum a ni.
Doordarshan chuan league nen an inzawmna chhunzawm lehin DD Sports-ah tun season inkhel zawng zawng hi a hmunah live-in an tichhuak dawn a, inkhel thlan chhuah bik thenkhat chu Unite8 Sports-ah pek chhuah a ni bawk ang.
Digital-ah thung chuan Z5 leh Prasar Bharati te OTT platform WAVES-ah inkhel zawng zawng live-a thlir theih a ni ang a. Mipuiten Unite8 Sports YouTube channel-ah phei chuan a thlawnin inkhel hrang hrang hi an live stream thei bawk ang.
Nildeep Mondal, CEO, Indian Football League chuan, “2026-27 season hi IFL tan pen khata hma sawnna pawimawh tak a ni a, ram chhunga football tuipuitute nen kan inzawmna lamah pawh hmasawnna duhawm tak a ni,” a ti.
“Zee pawh broadcast partner atan an lo tel takah leh inkhel tinte digital leh television platform hrang hrang atanga thlir theih a nih takah chuan league hi India chhunga entute tan awlsam zawka thlir theih a nih theih nan hmasawnna pawimawh tak kan la a ni. Season phurawm tak leh Indian club football hmasawnna tura thawh chhoh zel hi kan nghakhlel hle a ni,” a ti.
Bavesh Janavlekar, Chief Business Officer, Zee Sports Network chuan, “Indian football tan chuan hmun tinah entute hnen a thleng thei hi a lawmawm a ni. Z5 leh Unite8 Sports hmang hian IFL hi ram chhunga football ngainatute hnenah kan thlen zua tial tial a ni. Hei hi hun rei tak atanga kan duhthusam a ni a, IFL nen tang dunin league leh Indian football atan kalphung nghet din chhoh zel kan beisei,” tiin a sawi.