- Dr. J.T. Vanlalngheta, Advocate, Writer’s Lexis & Law
Thu hma hruai: High School kan kai laia sipai bang boxer thiam zet mai Pu Tlanga’n ka thiante nena min zirtir bak chhunzawm leh miah lo hian boxing chungchang tlem ka’n sawi khiah teh ang; infiamna ni si, FIGHT ni lawi si a ni hi a makna a ni ve pakhat a. Combat Sports-a ‘Fight’ hmang zingah chuan duhtu an tam ber em aw tih turin infiam mite zingah chuan mi mala khawvela sum la lut hnem ber an ni thei tlat mai. Hei vang leh, a ti mi kan nih hrim hrim vang pawh hian, infiamna chi zingah, Khawvel hriata inpho lan zelna hmanrua atan Zofate tih chi ber pawl a ni hial maithei.
Boxing hi infiamna lam chiah chuan upa pawl tak a ni a, kum 5000 laia upa a ni tawh; an upat dan indawtin han dah ila: Wrestling, Running, Archery, Swimming, Javelin Throw leh Boxing. Boxing ti hmasatute chu Sumerian leh Egypt-hote an ni; an lung ker atangin a hriat theih. Infiamna chi malah chuan Boxing hi ka ngaih san ber a ni tlat pek a, a pà ka tih vang a ni ngei ang! World heavyweight boxing title fight pawh hi ka hmana, channel ka en theih chuan ka hlah ngai meuh lo. October 17, 2026 Zirtawpni zana Pro Fight final ka en atanga rilrua awm ve tlem ka’n sawi zau (comment) ve ang e.
Fight chu:
- Flyweight: Lalrinngheta leh Lalenkawltira-te fight kha a hmuhnawm hle. Enkawla hian title fight hi vawi 3-naah a sual chhuak thei hi a tum ruhna leh inzir zelna kawnga a taimakna leh huaisenna vang a ni.
Title hloh ta Lalrinngheta’n Dr Muanpuia (fam)enkawlnaa lawm thu a sawi te hi a ţha hle mai, mi tam tak hian mahni tanpuitute leh enkawltute hnena lawm thu sawi nachang an hre lo thin hi chin loh tur a ni. Auto Rickshaw driver atanga Profight Flyweight tum 2, ’22&24-a a champ thei kha a fakawm. “Boxer-te hian mipuite support hi kan mamawh,” a tih angin mahni theihna zawnah i tawiawm zel ang u.
- Welterweight: HC Lalramfela bantam & lightweight champion (Seeded 1) vs Lalnunzira (seeded 2), National Gold Medalist te inhnek a hmuhnawm hle; an thiam dun ngei mai. Ramfela’n bul a tan tha, a tawp lamah Zira a tha thung; Ramfela hian upat lam a pan a, a fight tawpna a ni ta reng a, tun hma angin stamina a ngah ta lo deuh; a fight tawpna a ni ta reng a, weight hrang 3-a belt la thei hmasa ber nih a tumna chu a tham ral ta a ni; ka ui mang e. Zira hi a pianzia rengah a pà ngei mai; chak a phú e.
- Middle Weight: Lalthanliana jr., Electric Veng, Lunglei (Champion lai)vs Samuel Zadeng, Bawngkawn West (Samuel Zadeng vs Vanlalhriata, college veng te khelhah khan Vanlalhriata kha chak zawk hretah kei chuan ka ngai): Zan danga Thanliana kan hmuh thin ang kha kan hmu lo a ni, a in-fit tha lo. Mahse, a leh peka a rawn chhuah leh tur thu a sawi kha mipa zia dik tak a niin a huaisenzia a lantîr; mi tum ruh tak a ni tih a hriat e, kal zel turin kan duhsak e. Samuel Zadeng 6′.1″ hi a sang tha bawk a, opponent tan tawh a khirh hle, hma lam pan zel se.
- Bantam weight: Joseph Buihringpachha, College Veng, Siaha (Seeded No.1, 2019 atanga hneh loh la nei lo a ni, a boxing skill a tha hle) vs Lalrambuatsaiha (Seeded No.3, mi fit tha, thiam leh rang tak a, huai bawk), Ramthar North: An rang dun hle a, a hmuhnawmin an ngaih sanawm tak zet e. Boxer tha tak an ni. L.Joseph hian defence a nei tha a, hnek fuh a har hle. An technique hman, an defence a tha dun hle. An la naupang dun bawk a, an hma lam a eng khawp mai. Joseph-a hi thiam ka ti mang e.
- Lightweight
Lalkhawngaiha Venghlui vs Lalruatmawia, Chhiahtlang: Hei hi a hmuh nawm ber. Lalkhawngaiha a thiam si; mahse, a chau zawk hret a, kuah pawh a ching hret a, chutih laiin, chau thei lo khawpa ngaih a nih avanga ‘diesel engine’ tia an sawi fo hi a ngaih sanawm mang e. Anni pahnih inkhel hi mipui enchak ber niin a lang; mipui thawm pawh a tha hle; round 4-naah phei chuan mipui an thu hle hle thei lo, an ding suau suau tawh mai a ni. A ropui hle mai.
A pumpui thlirin Ruatmawia hi a tha zawk hret em tia ngaihtuah awl tak a ni; Lalkhawngaiha chak zawka an puan hi technique & skill vang niin a lang. Chutiang bawkin a hmaa kan en tawh Abednego leh Lalruatmawia inhneka mipui lamin Abednego chak zawka an ngaih kha technique & skill bawk niin a lang.
Boxer-te lawm thu sawina:
An vaia lawm thu sawinaa Pathian hming an lam hmasa zel kha a mawi piah lamah Kristian-te tih àwm rêng pawh a ni a, chhunzawm zêl ni rawh se.
Kan BOXER-te hi mipuite hian tawiawm zel hi a tha hle mai; chu chuan hma lam an panna kawngah nasa takin a ti phur zel ang. A tawp zanah phei kha chuan mipuiin thutna pawh an inchan lo a ni; a mawi tak zet e. A tawp zana mipuite kha in fakawm tak zet a, i chhunzawm zel ang u.
Hnek chhuak: ‘Hnek chhuak’ (verb & adv)hi LPS Profight-a ring sir atanga inhnekte chet dan lo sawi zautute (commentators) atanga kan hriat a ni. ‘Hnek’ reng reng hi chu ɓân dah dân pangngai aiin a rawn chhuak vek sa a, hetia Mizo tawng hman ngai loh hman hi thu uarna leh thu tih fiah leh zualna nia ngaih vanga hman niin a lang; mi thenkhatten ‘kawt’ ti mai lova ‘in kawt’ an ti kher nen a kal phung a inang a, nakinah chuan ‘hnek’ tih ringawt hian a sawi tum chiang loah an la ngai thuai ang a, duh thu chu a sam lo deuh. LPS Pro Fight comment-tute erawh an thiam hle; boxer-te ang thoa thiam an ni e!
A tlangpuia lakin boxer-ten kha ai khan exercise la nasa vek ‘r’u! Chutih laiin, Belt la phak ta lo te leh final thleng phak ta lo zawng zawngte, hun lo la kal zel tur atan duhsakna ka hlan a che u.