Khawvel hmasawnnaa thil pawimawh ber mai power supply hi kum 50 chhung zet state kan nih hnuah pawh mumalin kan la nei hlei thei lo niin a lang a. Kan power supply mumal loh avanga buaina kan tawh hian hmasawnna lamah thui tak min pawt ding reng a ni ber. Power supply kan neih mumal loh avanga mipui tawrhna hi a namenlo ta hle mai.
Kan power supply neih ve hi nikhatah vawi tam a tawp a. A thim a, a eng leh a. A changin a rei deuh a, a changin nilengin hna a thawh theih loh a. Power deptt lam hi engnge a thim chhan han zawt ila line a fall, a chhiatna lai kan chhui mek, a changin shut down kan la, a changin phai atangin power supply kan hmu tlem, a changin transformer a puak, a changin line kan siam mek. Heti hian kum 50 dawn hun kan hmang liam chu a ni ta mai! A dept. lam lah chuan tun aia hmasawn dan hi an hre chuang lo niin a lang.
Kan power dept. hi enfiah a tul ta tak zet a ni. A chhunga thawktute lah chu an hausa viau hlawm lawi a! Heti taka harsatna mipuiin kan tawh hi a changa thleng palh ni lovin, nitina kan awmdan a lo ni ta.
Sorkar thar apiangin mipui hnenah power supply tha min tiam a. Mahse, kalphung pangngai bak beisei tur a vang hle.
Kan power dept. hi sorkar tan sum sensona a sang em em a, an hlawh tur hi sawrkar tan phurrit a ni mek.
Mi ramah chuan power department hi sawrkar hnuaiah awm lovin corporation vekin an kal a. A thawktute hlawh sorkarin a ngaihtuah buai a ngai lova. An power pekchhuah atanga an pawisa hmuh chuan an inenkawl theiin an la hlawk zawk a, chutianga sumdawng an nih avang chuan power pekchhuah that leh pekchhuah tam an mamawh a, tan pawh an la hle. Keini ve ah chuan mipuiin power hi nei mumal lovin, an duh dan danin min sawp kual mahse an hlawh kha sorkarin a kim thlapin a pe reng tho. Mipui hnenah bat an nei lem lo. Lo thim nileng zankhua mai mai mah ila an tan engmah tak tak a nghawng loh avangin mipui hian kan tuar nasa em em mai a ni.
Hetiang anih avang hian kan power dept. hi sorkar hian corporation-ah dah se kan ziaawm ngeiin a rinawm. Power dept. hi corporation a leh hian kan ram hmasawnna hian nasat takin a tangkaipui dawn tih chiang sa reng a ni. Chu chu tunge ti ang ti ila, a ti theitu chu sorkar a ni. Ram leh mipui hmangaihtu tan chuan ngaihtuah a hun e.