Mizo hmeichhe zaithiam leh thisen pe hnem ber Rebecca Saimawii chuan India rama Beer company lar takin cheng nuai khat leh sing hnih (Rs 1.2 lakh) hlawh tura an sawmna a hnawl.
Rebecca Saimawii’n social media-a a tarlan danin, vawiin khan India rama Beer company lar tak Tuborg chuan November ni 14 leh 15-a Bangalore-a an event neih turah ni khat tel ve turin leh reels pakhat siam, Instagram Story pahnih share ve turin an sawm a. Chumi atan chuan Rs 1.2 lakh hlawh pek an tum a ni.
Mahse, Rebecca-i chuan ngaihtuah lawkna pawh awm lovin a hnawl nghal thu a sawi a. “Mizote hi Kristian kan ni a, mifel vek erawh kan ni lo a. In sum min hlui hi ka awt ve tho; amaherawhchu, keichuan ka chhia leh tha hriatna atanga ka chhutin, ka tih tur a ni lova. Thil dang min la faktir zawk dawn nia,” tiin a sawi a.
Sawmna ka hnawl avang hian ka fel ta em em tihna a ni lo a, kan inbiak zawh khan, englai maha min kalsan ngai lotu Pathian hnenah mittui tlain lawmthu ka sawi ve asin! Mi zu inte hi ka sawisel hauh lo a, mi nunah ka inrawlh-in rorelsak ka tum ngai bawk lo tiin a social media account lamah a sawi.