Arsenal captain Martin Odegaard leh Bayern Munich chu tun hnaiah an sawi zawm mek a. A hma daihah pawh anni hi lo inbe tawh thin mah se tun dinhmunah chuan Bundesliga club-in lak luh atana an ruahman zingah a tel rih lo niin Sky Sports Germany chuan an tar lang.
Thu thang karah Arsenal chuan an captain chu contract thar ziahpui tumin hma an la chho mek a, Odegaard pawh an dawr tan tawh niin an sawi.
Sky chuan Odegaard hian Bayern tana khelh chu hreh lo mah se Arsenal-in contract ziahpui an la tum hle a. Gunners hian a contract hi an pawt sei thei ta lo a nih chuan hralh dan kawng erawh an dap a ngai dawn a, European club lian dangte pawhin an ngaihven hle bawk a. Amaherawhchu, contract pawh sei chu an ngaih pawimawh ber a ni mek.
Odegaard-a contract neih lai hi kum 2028-ah a tawp dawn a; chuvangin, Arsenal hian a contract hi a kum tawp thlen hmaa tihpuitlin hman an duh hle a. Kum 27 mi hi inelna sang berah hun rei tak chu a la inkhel thei ngei dawn a ni.
Norway captain ni bawk hian 2025/26 season kha a inhliam avangin a hmang fuh lo hle a, vawi sarih vel a inhliam hman a, kha vang khan club leh ram tan vawi 30 ngawt a inkhel thei lo a ni.
Season hman mekah chuan a harsatna tawh thin kha a reh tawh a nih hmel a. Odegaard hian June 7 atang khan Norway tana vawi khat a khelh loh bak chu a la khel tluang hle a, a khelh theih vawi 24-ah a inhnamhnawih vek a ni.
Hengah hian vawi 21 chhung chu club leh ram tan khel loin a awm lo hrim hrim a. A che tha chho hle a, heng inkhel vawi 24 a khelhah hian goal nga a khung bakah mi goal thun tur vawi kua a siamsak bawk.