Dan lova pension la zawn chhuah nan Mizoram sorkar chuan Treasury Office hrang hrangah pensioner leh family pension late enfiahna Thawhtanni atang khan a tan.
He enfiahnaah hian pensioner leh family pension la hrim hrim chu anmahni ngei inlan tura tih niin, an life certificate, marriage/re-marriage certificate, income certificate leh aadhaar card xerox-te an endik a. An hmel leh Pension Payment Order (PPO)-a an thlalak awm visual identification hmangin a inmil leh mil loh thlengin an enfiah bawk.
Pensioner zinga tar chak lo leh dam lohna avanga inlan thei lo, harsatna hrang hrang neite chu Finance department hotute chuan application hran hmanga enfiah tur a nih thu an sawi a. Hetiang harsatna nei bikte hi Treasury Office-a thawkten an inah ngei kalchilh a, an endik dawn a ni.
Tun dinhmunah hian Aizawl South Treasury-ah Pensioner leh Family pension la mi 19,000 vel an awm mek a, Aizawl North Treasury-ah hian mi 2,707 an awm mek bawk a ni.
Thawhtanni vek khan Lunglei district Task Force Team No. 4 chuan Team Leader Lalruatzeli, Treasury Officer, Lunglei hoin Lunglei district chhungah dan dik lova family pension la an awm leh awm loh chhui chhuak turin family pensioner-te a hmunah kal chilhin endik an kalpui tan.
Lunglei District Task Force hian November 2 atanga 13 chhungin Lunglei khawpui chhungah endikna hi kalpuiin, hemi hnu hian district chhung khaw hrang hrangah an kalpui chhunzawm dawn a ni.
Task Force-te hian pensioner awmna veng hrang hrangah kal chilhin local council, YMA leh Lunglei District Pensioners Association (LDPA) te nen tangrualin family pensioner-te dinhmun an enfiah a, pensioner-te chu Treasury-a a hranpaa in-report ngai lova an lehkha pawimawhte lo chin felsak nghalin, an endik tawh chinah rinhlelh kai insawifiah tura hriattirna pek pakhat an nei tawh a ni.
Mizoram sorkarin July 1 atanga September 30, 2026 chhunga Pension Payment Order (PPO) mahni duh thua pek kirna hun a hawn chhunga pe kir lo, dan dik lova pension la chhunzawm an awm a nih chuan an chungah dan anga hma lak a nih tur thu a puang a ni.