Mizoram Entrepreneur’s Chamber (MEC) buatsaih ‘Young Entrepreneurs Summit 2026’ tum khatna Thawhlehnia Woodland Hill, Zonuam-a a hmanpuinaah Chief Minister Lalduhoma chuan, Bana Kaih loan dawng turin political party unit leh block hriatpuina te, party letterhead pawh thlak leh sawipuitu neih a ngai lo va, neutral emaw eptu party emaw a nih pawhin an project a rintlak a nih chuan a tawk tih a sawi.
Chief minister chuan tunah hian Chief Minister Special Package Phase III diltu a sing telte chu uluk taka endik mek an nih thu sawiin, tun hma anga a dil apiang pek mai leh party-a lut tura inthlemna atana hman thin anga ti tawh lo vin, endik phawt leh dawng tlak nia hriat hnuah pawisa pek hmain training pek leh vek phawt thin an nih thu a sawi.
ZPM sorkarin mahni kutkawiha din chhuah tum entrepreneur-te tana theih tawp a chhuah thu leh, pung awm lo leh dahkham (guarantor) ngai lo loan system ‘Bana Kaih’ ang hi India hmun dangah pawh a awm kher lo tura a ngaih thu a sawi bawk.
He loan dawng tawhte zingah loan rul tha lo (NPA) record nei an la awm miah loh thu sawiin, hei hian Mizo thalaite rilru a dik tawh zia a lantir rualin thalaite tana din chhuahna hun remchang lian tak a inhawng mek tih a sawi a ni.
He Summit hi session hnih a then niin, session khatnaah Pachhunga University College (PUC) leh NIT atanga team hrang hrangte hmangin ‘Innovation Challenge’ inelna buatsaih a ni a. Session hnihnaah chief minister hian MEC member-te thil siam hrang hrang a tlangzarh a, inelnaa lawmman dawngtute hnena lawmman a sem hnuah Innovation Challenge result hi puan zui nghal a ni bawk.