Aizawl: Ministry of Power chuan Thawhtanni khan Mizoram Power & Electricity Minister F. Rodingliana chu North Eastern Regional Power Committee (NERPC) Chairman atana ruatna order a tichhuak a, he dinhmun chelh thei Mizoram power minister hmasa ber a lo ni ta a ni.
Electricity Act 2003 behchhana hmarchhak state 7-te tana Ministry of Power hnuaia din NERPC Chairman thar F. Rodingliana hian he nihna hi chelh nghalin, New Delhi-ah hmalakna hrang hrang a nei zui nghal a ni.
New Delhi-a cham mek F. Rodingliana hian Prime Minister Narendra Modi hawn, Ministry of New & Renewable Energy (MNRE) leh International Solar Alliance (ISA) tangkawpin Bharat Mandapam-a an buatsaih ‘Bharat Renewable Energy Summit & Expo 2026’ a telpui a. Hawnna hun hman zawh hian State Chief Minister leh Energy Minister-te puala Round Table Plenary Session-ah telin, Mizoramin renewable energy sector-a kawlphetha thar chhuahna tur theihna a ngah zia sawiin, MNRE Ministry puihna a dil a; ‘Small Hydro Power Development Scheme’ hmanga puih dan dap tur leh PM Surya Ghar: Muft Bijli Yojana rooftop solar scheme-a state subsidy pe tel state tlemte zinga Mizoram a tel ve thute Union Minister hnenah hian a thlen a ni.
Delhi Mizoram House-ah New Development Bank (BRICS Bank) aiawhte hmuin Tuivai Hydro Power Project siamna tura sum tanpuina chungchang a sawipui bawk.
NDB aiawhte chuan Department of Economic Affairs (DEA) kaltlanga indawr a nih hnuah funding hi an pawm tur thu an hrilh a ni.