Mizo zinga rilru doctor hriat hlawh ber zinga mi, Dr. C. Lalhrekima lehkhabu thar, ‘Lawm ve mai teh!’ chu Thawhlehni zan khan Chawlhhmun Presbyterian Kohhran Hall-ah Rev. Malsawmtluanga, Chawlhhmun Pastor Bial vawngtuin a tlangzarh.
KTP, Chawlhhmun Branch-in an chhuah lehkhabu, phek 304-a chhahah hian rilru hriselna lama pui thei, chhungkaw inenkawlna chungchang leh ruihhlova harsatna tawk mekte pui thei tur thupui 73 a awm a ni.
‘Lawm ve mai teh!’ hi Rs. 350 man a ni a, lehkhabu zawrhna hrang hrangah lei theiha chhawp chhuah nghal a ni.
Dr. Hrekima hian a hmain lehkhabu paruk a lo tichhuak tawh a, a lehkhabu hmasate pawh Mizo lehkhabua hralh hnem ber ber a ni hlawm a, thenkhatte phei chu vawi sarih chhut nawn tawhte pawh a awm.