Hollywood lemchan thiam Johnny Depp chuan Jack Sparrow lema chang tura a la in fit that thu leh chang tura a la inpeih reng thu sawiin, Pirates of the Caribbean film dangah pawh producer Jerry Bruckheimer nen an la thawhdun zel a beisei thu a sawi.
Depp hian a film thar Ebenezer, November 13-a tihchhuah tur buaipuia a tih lar meknaah hian he thu hi sawiin, Jack Sparrow la nih zel pawh a duh thu a sawi a ni.
A film tharah hian McKellen, Rupert Grint leh Andrea Riseborough te nen thawkhoin, an chang ho a, hemi tih lar hna hi tunah hian a thawk mek bawk.
An kawmnaah Depp chuan Pirates film 5 siam tawhah Jack Sparrow ka ni tawh a, la nih zel ka duh bawk. Dik tak chuan ka phur tulh tulh a, pirates ni tur hian ka fit telh telh bawk niin ka hria, a ti.
Producer Bruckheimer nen hian kan thawhdunna a tha a, thawnthu tha tak a lo ngaihtuah chhuak leh thuaiin ka ring. Kan inthianthatna a nghet a, thawhpui nuam tak a ni, a ti bawk.
Sawi tak angin Depp hi Pirates of the Caribbean film panga siam tawhah la tel vekin, Academy Award nomination pawh a lo hlawhchhuah phah tawh a ni.
Heng pirates film panga tihchhuah tawhte hian khawvel pumah $tld 4.5 chuang zet a lalut tawh a, Dead Man’s Chest leh On Stranger Tides te phei kha chuan khawvel pum buapa box office-ah dollar tluklehdingawn khat an hmuchhuak tawh bawk.