An hawn tirh atanga kum 100 chuang a liam hnuah Milan khawpuia khelmual lar tak, San Siro chuan kar kal ta khan a zin kawng tawpna a dai tan a, Generali Stadium bul tanna a ni ta bawk.
Milan hmun lar tak zinga mi, Castello Sforzesco-ah hmun pawimawh tak din tur tar chhuah a ni a, AC Milan leh Inter Milan chuan an khelmual thar tur ruahmanna an pho chhuak a, San Siro tia hriat lar, Stadio Giuseppe Meazza chu thiah a ni dawn a ni.
Khelmual intawm ngar ngar, Italian football club lian pahnih hian khelmual thar hming phuah phalna chu an lo hralh tawh a, Generali Stadium tia vuah a ni ang a. Generali hi Italy-a insurance company lian ber a ni.
Khelmual thar hi sak a nih theih nan club pahnih chuan nikumah khan architectural firm hmingthang, Foster+ Partners leh Manica te chu inremna an lo neihpui tawh a. Anni pahnih hian London-a Wembley Stadium, San Francisco-a Chase Center leh Qatar-a Lusail Stadium te an lo duang tawh a ni.
Norman Foster leh David Manica te chuan Ninganiah kal ta khan ruahmanna hi an tar chhuak a. A ruangam tur an duan hi thil mum lampang niin, lunghlu pianhmang ang 80 rem khawm anga duan a ni a, a chung khuh chu mawi takin a kual a ni.
Lunghlu pianhmang hmang hian pawn lam atangin a chhung lam a hmuh theih bakah khelmual chhung atangin khaw thlirna tha tak a awm bawk.
Lunghlu pianhmang hmawr sang ber chu meter 60-a sang niin goal hnung lam hmun pahnih, Italian tawnga ‘curva’ an tih, mipui thutna hmun a awm ang.
Stadium hi dawhsan chungah tun din a ni ang a, a hnuai lamah lirthei dahna, museum leh club dawr a awm ang.
Khelmual hi chhawng hnih niin thutna 71,500 a awm dawn a. Thutna hi mual nena an inhnaih dawn avangin khelmual phul chunga thu ang maiin an inhria ang tiin Manica chuan a sawi a ni.
Inkhel entute au ri hriat chian lehzual theihna tura duan a ni a. Khawvela inkhel enna hmun nuam leh boruak sang ber ni thei tura an rilruk a ni.