Portugal legend Cristiano Ronaldo chuan ram tana football khelh a chawlhsan tih a puang.
Kum 41 mi hian an ram tan vawi 234 khel hmanin goal 146 a thun a. Kum 2003-a an ram kawr haa a inlan hmasak ber atangin khawvela ram tana khel tam ber leh goal thun tam ber a ni.
September thla khan Nations League-a Denmark nen an inkhelh tuma inkhel bul tantu zinga a tel loh hnu lawkah Portugal camp a chhuahsan a, a khel nawn leh dawn ta lo a ni.
“Portuguese mipuite hnenah kan ram team number seven kawr chu ka hlan kir hun a lo thleng ta a ni,” tiin Ronaldo hian Instagram-a video-ah a chawlh thu hi a puang a ni.
“Ka ta tur chauh a ni ngai dawn lo tih ka ngaihtuah thin a; mahse, kum 23 chhung khan he kawr ha hian tih tur leh mawhphurhna tam tak ka nei tih ka hria a, khawvel hmun hrang hranga venhim leh khelmual chhunga ken luh kha ka tih tur niin ka hria,” a ti.
“Vawiin hian chhuanthar hnena hlan a hun ta a. Thutlukna thenkhat chu rilru atang ni lo, thinlung zawng zawnga siam ngai a nih avangin thutlukna awlsam tak erawh a ni lo,” a ti.
“August, 2003 atanga zin kawng bul tanin kumkhuaa ka nun zawng zawng thlaktu chu a lo tawp ta a ni,” a ti.
Ronaldo hian a chawlh chhan tak tar lang tel lo mah se a hma lawka coach Jorge Jesus nena an inkar buaina leh national team camp a lo chhuahsante kha football khawvel titi a tling.
Ram tana khel tam ber leh goal thun tam ber a nih bakah Al-Nassr forward hi Portugal tana mi dangte goal thun tura siamsak tam ber niin vawi 46 a siamsak. Euro 2016-ah a champion-pui a, Nations League (2019, 2025)-ah vawi hnih a champion-pui bawk.
Footballer zingah World Cup-a vawi ruk inlan thei awmchhun a ni a, hengah hian goal a thun vek bawk a, a tithei awmchhun a ni.
Ballor d’Or vawi nga dawng tawh hian kumina US, Mexico leh Canada-in World Cup an thlen kha a tan World Cup hnuhnung ber a nih thu Dallas-ah a lo sawi tawh bawk.
Ram tan chawl tawh mah se Ronaldo hi club football-ah erawh chuan Saudi Arabian club tan a la khel chhunzawm dawn a. Inelna hrang hrang goal 985 thun tawhin goal 1,000 tlin ngei a tum a rinawm hle.
Zirtawpni hian Portugal hian November-a Nations League-a Denmark an mikhual tur leh Wales an tlawh tura khel tur (squad) an puang ang.
Portugal Football Federation chuan an player ropui ber pakhat ‘zah taka inthlahna hun awm miah lo’ chungchangah engmah sawi an nei duh rih lo.
Ronaldo hi a inkhelh chhung zawnga a elpui ni reng, Argentina legend Lionel Messi-a chuan October thla khan ram tana khelh a lo chawlhsan ve tawh bawk.