Chief Minister Lalduhoma chuan Mizoram chu Ginger Capital of India tih a nih tawh bakah, Assam khumin Silk Capital nih an tum thu a sawi.
Ningani khan Serchhip DC Conference Hall-ah Serchhip bawrhsap Paul L. Khuma kaihhruaiin Chief Minister Lalduhoma hovin Serchhip district chhunga sorkar department hrang hrangte hmalakna leh hmasawnna hnathawh thlir hovin an thukhawm a. Lalduhoma chuan he thutkhawm hi Mizorama hmasa ber atan, district level-a department hrang hrangten hmaichhana chief minister hnena an harsatna an thlen theihna tura buatsaih a nih thu a sawi a, “District dangah pawh tih chhoh zel tum a ni,” a ti.
Chief minister chuan ‘Vikshit Bharat 2047’ rualin ‘Transformed Mizoram 2047’ chu sorkar vision a nih thu a sawi a, tun dinhmuna state GDP zaa 0.1 awm mek chu zaa 1-a hlankai tum a nih thu a sawi a. Mizoram chu ‘Ginger Capital of India’ a nih tawh rualin Assam khuma ‘Silk Capital’, ‘Winter Capital of India’ leh ‘Digital State’ nih tuma hmalak mek a nih thu leh ‘CM Blue Mission’ tlangzarh tum a nih thute a sawi.
Department hrang hrangte inkarah thawhhona tha a ngaih pawimawh thu sawiin, Serchhip district chu model district ni tura a duh thu a sawi bawk.
Thutkhawmah hian ruhrel leh project hrang hrang thawh mek te, harsatna awm te leh hmachhawpte chipchiar taka sawi hovin, thawhhona tha zawk siam leh harsatna sutkian dan turte pawh rel a ni a. Serchhip district chhunga sorkar pisa hrang hrang 43 an tel a ni.